Nunatsinni Eqqartuussivik
Pinerluttulerinermi suliat
Pinerluttulerinermi suliat suliaapput politiinit mississuivigineqarsimasut, eqqartuussiviup isummerfigisassai, pineqartoq pisuunersoq inatsimmillu unioqqutitsisimasutut pineqaatissinneqassanersoq.
Pinerluttulerinermi suliassat eqqartuussivimmi suliarineqartarput, pinerluttuliortoqarsimagaangat, politiillu isumaqarpata uppernarsarsinnaallugu kina pinerluttuliorsimanersoq.Pinerluttulerinermi suliassat aallartinneqartarput inunnut, pinerluttuliorsimasutut pasillerneqartunut. Pinerluttulerinermi suliassat politiit aallartittarpaat paasiniaanermik.
Qanoq isumaqarpa pasineqarluni?
Politiit isumaqarpata, inummut ataatsimut arlalinnulluunniit naammattumik uppernarsaatissaqarlutik, taava taakku suliami pasisaalersarput. Tamatuma kingorna unnerluussisussaatitaasut suliassaq eqqartuussivimmut nassiuttarpaat.
Eqqartuussut suli naammassinngitsoq tigummigallagassanngorsinnaavunga?
Aap, paasiniaanermut imaluunniit isumannaatsuunissamik tunngaveqartumik pisariaqartinneqaraangat, unnerluussisussaatitaasut eqqartuussivik qinnuigisarpaat inup pasisap tigummigallagassanngortinneqarnissaanik, eqqartuussuteqarfigineqannginnerani.
Kikkut unnerluussisussaatitaappat?
Eqqartuussivinni suliassani politiit illoqarfimmiittut unnerluussisussaatitaasarput. Suliaq nunap eqqartuussisuuneqarfianut suliareqqitassanngortinneqarpat politimesteqarfik unnerluussisussaatitaasarpoq.
Qanoq isumaqarpa unnerluutigisaalluni?
Pasisaq eqqartuussinissamut aggersarneqartarpoq tassungalu ilanngullugu tunniunneqartarpoq unnerluussut. Pasisaasoq tamatuma kingorna taaneqartarpoq "unnerluutigisamik".
Unnerluussutip suna imarivaa?
Unnerluussutip ilaatigut imarissavaa suliap sumut tunngasumik naatsumik allaaserineqarnera, aamma malittarisassat suut unnerluutigisap unnerluussisup isuma malillugu unioqqutissimanerai.
Unnerluutigisaaguma qanoq eqqartuunneqarsinnaavunga?
Pinerluttulerinermi suliani unnerluutigisaq eqqartuunneqarsinnaavoq inissiisarfimmut inissinneqarnermik, inissiisarfimmut inissinneqarnermik patsisitalimmik, inuiaqatigiinni sulisitaanermik imaluunniit akiliisitsissummik. Inummut ulorianartumik pinerlunneq soorlu peqqarniitsumik nakuuserneq, pinngitsaaliilluni kujanninneq aamma toqutsineq nalinginnaasumik kinguneqartinneqartarput inissiisarfimmut inissinneqarnermik.
Eqqartuussutaasoq suliareqqitassanngortissinnaavara?
Pinerluttulerinermi suliani eqqartuussutit nunap eqqartuussisuuneqarfianut suliareqqitassanngortinneqarsinnaapput.
Paasissutissat kingulliit: 26. juunip 2023