Nunatsinni Eqqartuussivik
Akileeqqusissut
Akileeqqusissut atorlugu akiitsut 100.000 kronit tungaanut annertussusillit akilertinniarnissaannut eqqartuussivimmit ikiorneqarsinnaavutit. Akileeqqusissut ajornannginnerusumik akiliisitsiniarnertut taaneqartarpoq.
Akiligassaqarfigineqaruit akileeqqusissummik Kalaallit Nunaanni Eqqartuussivinnut tunniussillutit aningaasat akilerneqarnissaannut eqqartuussivimmit ikiorneqarsinnaavutit.
Suliaq Kalaallit Nunaanni Eqqartuussivimmit suliarineqassaaq kingornalu piumasarineqartoq sumiiffinni eqqartuussivimmit akiliisitsiniartoqarluni.
Akiligassallip ilinnut akiligassaqarnerminnik isumaqataanera ilimagilluinnarukku akiliisitsiniarneq ajornannginnerusoq toqqarsinnaavat. Akiitsulli katillugit erniat sulimullu aningaasartuutit ilanngunnagit 100.000 kronit ataatissavaat.
Suleriaatsip uuma ajornannginnerusup immikkuullarissutaa tassaavoq Kalaallit Nunaanni Eqqartuussivimmut taamaallaat saaffiginnissagavit, taakkulu akileeqqusissummik suliaq ingerlatissavaat, akilerneqarnissaalu siunertaralugu sumiiffigisanni eqqartuussivimmut ingerlateqqillugu.
100.000 kronit sinnerlugit piumasaqariuit saqitsaannermik suliamik nalinginnaasumik Kalaallit Nunaanni Eqqartuussivimmi aallartitsisinnaavutit.
Paasissutissat suut allassavakka?
Illuatungeriit aqqi, najugai, illit piumasaqaatit qanorlu taanna aallartissimanersoq pillugu paasissutissanik akileeqqusissut ilaatigut immersorneqassaaq.
Akileeqqusinermi immersugassaq ilitsersuutillu qupppernermi uani nassaarisinnaavatit. Qanoq immersornissaa pillugu apeqqutissaqaruit Kalaallit Nunaanni Eqqartuussivik saaffigisinnaavat, taakku siunersussavaatsit.
Suliaq qanoq ingerlanneqassava?
Akileeqqusinermi immersugassami kissaatigalugu allassimagukku, taava Kalaallit Nunaanni Eqqartuussiviit isumagisinnaavaa:
- Akileqqusissutip eqqartuussutitulli pituttuilluni atuunnissaa. Tamatuma kingorna Kalaallit Nunaanni Eqqartuussiviit akileeqqusissut najukkanni eqqartuussivimmut akiliisitsiniartussamut nassiutissavaa. Tassungalu tunngatillugu eqqartuussiviup illit aamma akiligassalik aggersassavaasi, akiligassallip akiliinissamut periarfissai akiitsullu akilerneqarnissaata tungaanut qularnaveeqqusiinissaq pillugu ataatsimeeqatigalusi. Nalinginnaasumik suliaq tassunga killeqartarpoq.
- Ilimagisamiit allaanerusumik pisoqassappat, akiligassalik piumasaqaammut akerliussappat, akileeqqusissut tunngavigalugu Kalaallit Nunaanni Eqqartuussivik eqqartuussinermik suliamik aallartitsisinnaavoq.
Qanoq akeqarpa?
Akileeqqusissut Kalaallit Nunaanni Eqqartuussivimmut tunniukkukku eqqartuussivinnut akileraarummik aamma akiliissaatit.
Eqqartuussivinnut akileraarut 500 kroniuvoq, taannalu Kalaalli Nunaanni Eqqartuussiviup Grønlandsbankenimi kontoanut akilerneqassaaq/nuunneqassaaq.
Registreringsnummer 6471 aamma kontonummer 0001032663.
Ilitsersuutit immersugassallu
Paasissutissat kingulliit: 16. juulip 2025