Suliassanngortinneqassagaluaruit

Saqitsaannermik suliassaq nalinginnaasumik aallartittarpoq, suliassiisup eqqartuussivimmut aggeqqusissut nassiuppagu. Eqqartuussiviup aggeqqusissut ilinnut ingerlateqqissavaa akissuteqarnissannut piffissalerlutit, nalinginnasuuvoq sapaatit akunnerinik sisamanik.

Pingaaruteqarpoq piffissap killiliussap naannginnerani akissuteqarnissat, taamaaliunngikkuvimmi najuutinngitsoortutut eqqartuussaassagavit. Imatut paasillugu, suliassiisup suliassiissutimini ajugaaffigigaatit.

Aamma pingaaruteqarportaaq, piffissami eqqartuussiviup aggeqqussutaani allassimasumi najuunnissat. Taamaaliunngitsooruit taava aamma najuutinngitsoortutut eqqartuunneqassaatit. Taamaakkaluartorli eqqartuussissuserisoq ilinnut sinniisutut kisimi najuussinnaavoq.

Aggeqqusissut tiguniariutaa inatsisitigut siunnersorneqarnissaq imaluunniit eqqartuussissuserisumik atassuteqarnissaq ajunngilluinnassagaluarpoq, Eqqartuussissuserisup aggeqqusissummut akissuteqarnissannut ikiussavaatit.

Suliassanngortitatut periarfissaqarputit inatsisitigut siunnersuisarfik saaffigisinnaallugu aammalu ilinnut aningaasartuutaanngitsumik eqqartuussissuserisoqarnissarpit qinnutiginissaa, tamatumani aningaasarsiatigut piumasaqaataasut naammassisimagukkit. Aningaasartuutaanngitsumik eqqartuussissuserisoqarnissaq qinnutigineqartarpoq Naalagaaffiup sinniisuanut.

Sunaagaluarnersoq pissutigalugu piffissap killiliussap iluani akissuteqarsimanngikkuit taava suliap aallaqqaataaniit aallarteqqinneqarnissaa piumasarisinnaavaat najuutinngitsoornermi eqqartuussutip ulluaniit sapaatit akunneri sisamat qaangiutinnginnerini. Najuutinngitsoornermi eqqartuussut suliareqqitassanngortinneqarsinnaanngilaq.

Saqitsaannermik suliassaq nalinginnaasoq eqqartuussivimmi imaluunniit Kalaallit Nunaata Eqqartuussiviani ajorsarfigissagaluarukku, periarfissaqarputit eqqartuussut Nunatta Eqqartuussisuuneqarfianut suliareqqitassanngortissinnaallugu. Suliaq eqqartuussuteqarfigineqarneraniit kingusinnerpaamik sapaatit akunneri sisamat qaangiunnerini suliareqqitassanngortinneqarsimassaaq, taavalu eqqartuussivimmi akitsuut nutaaq akilissallugu.