Kalaallit Nunaanni akileeqqusissutit pillugit aaqqissuussineq nutaaq

Akiliisitsiniarnermi sulianik ingerlatsinerup eqaannerusup Danmarkimi atorneqartup eqqunneqarnissaa pillugu Naalakkersuisut noqqaasuteqareersullu, suleriaaseq juulip aallaqqaataani 2025-miit atorneqarsinnalerpoq. Aaqqissuusineq nutaaq eqqartuussisarnermi inatsisip allanngortinneqarnerata, inatsimmi kapitali 22-mi takuneqarsinnaasup ilagaa.

Akileeqqusissut sunaava?

Akileeqqusissut allaffissornikkut suleriaasiuvoq, akiligassaqarfik eqqartuussivimmit ikiorneqarluni akiligassanik, erniat suliamullu aningaasartuutit ilanngunnagit, annerpaamik 100.000 kr.-mik akiliisitsiniartoqarsinnaalluni. Eqqartuussiviup aalajangiussaa eqqartuussutitulli pituttuisarpoq. Aaqqissuussineq sulianut akiligassaqarfiup akerliliinissaanik ilimanaateqanngitsunut tulluarsagaavoq, akiitsunut annikinnerusunut suliaqarnerup pisariillisaanissaa siunertarineqarluni.
Saqitsaannermik sulianik nalinginnaasumik aallartitsinngikkaluarluni akiligassaqarfik maanna immersugassamik immikkuullarissumik eqqartuussivimmut nassiussisinnaalerpoq, taamaaliornerlu piffissamik nukinillu sipaarfiussaaq.

Akileeqqusissut qanoq atorneqartarpa?

Kalaallit Nunaanni akileeqqusissutit tamarmik Kalaallit Nunaanni Eqqartuussivimmit, nunami kisiartaalluni suliassinneqartussaasumi suliarineqassapput. Suliariaaseq ima ingerlasarpoq:

1. Akiligassaqarfiup immersugassaq piumasaqaatinik imalik nassiutissavaa
   Akiligassaqarfik piumasaqaatit illuatungeriillu pillugit paasissutissanik immersugassamut immersuissaaq eqqartuussivinnullu akitsuut 500 kr. akilerlugu. Ilitsersuut immersugassarlu Kalaallit Nunaanni Eqqartuussiviup nittartagaani pissarsiarineqarsinnaapput: https://www.domstol.dk/gl/rettenigroenland/suliat-ataasiakkaat/akileeqqusissut/. Immersugassaq Kalaallit Nunaanni Eqqartuussivimmut nassiunneqassaaq, eqqartuussiviullu akileeqqusissummi piumasaqaatit naammassineqarnersut nalilersussavaa.
2. Inatsisilerinermi nakkutilliineq oqaaseqaallu siulleq
   Kalaallit Nunaanni Eqqartuussiviup akileeqqusissut inatsisit naapertorlugit nalilersussavaa siullermillu oqaaseqaasiorluni, oqaaseqaat eqqartuussiviup siullermeersumik suliamik akuersineraa.
3. Akiligassalimmut nalunaarneq
   Akileeqqusissut siullermeersumillu oqaaseqaat akiligassalimmut nassiussineqassaaq.
4. Akerliliisoqanngilaq – aappassaanik oqaaseqaat
   Nalunaarutiginninnerup kingorna sapaatit akunneri sisamat qaangiutsinnagit akiligassalik qisuarianngippat, eqqartuusssivik aappassaanik oqaaseqaasiussaaq. Akileeqqusissut siullermeersumik aappassaanillu oqaaseqaatitalik eqqartuussutitulli kinguneqarluni atuuttarpoq.
5. Pinngitsaaliissummik atuutitsineq (akiliisitsineq)
   Pappilissat ataatsimoortillugit tunngaviussapput, eqqartuussiviup pinngitsaaliissummik atuutitsinerani toqqaannartumik tunngavigineqarsinnaapput. 

Akileeqqusissutit pillugit malittarisassat akiligassaqarfiup nalinginnaasumik saqitsaannermik suliamik aallartitsinissaanut sanilliullugu, ajornannginerusumik akiliisitsiniarsinnaaneranut neqeroorutitut isigineqassapput.

Akerleriittoqassappat

Akiligassalik piumasaqaammut akerliliissappat suliaq eqqartuussivimmi nalinginnaasumik suliarineqartussanngorluni Kalaallit Nunaanni Eqqartuussivimmut ingerlateqqinneqassaaq.