Eqqartuussisoqarfiup eqqartuussutaa aalajangersarneqarpoq - K 086/24

Eqqartuussissut Nunatta Eqqartuussisuuneqarfianit oqaatigineqarpoq ulloq 1. juuli 2024

Pisimasumi 3-mi pisuunermik apeqqut pillugu
Unnerluutigineqartoq aamma pinerlineqartoq assigiimmik nassuiaapput illumi issiallutik imeramik kisimiillutik. Assigiimmik nassuiaapput imernerup nalaani silaarullutik. Akerlilerneqarsinnaanngilaq pinerlineqartoq unnerluutigineqartorlu illumiinneranni pinerlineqartoq nulumigut savimmik marloriarluni kapitittoq. Unnerluutigineqartoq nassuiaavoq nammineq panimminnut sianerluni ikioqqulluni pinerlineqartoq natermi nalammat aanaarluni. Savimmik kapisinerit tamatuma kingorna ernisussiortumit mersorneqarput. Allassimasut tunngavigalugit ernumanartussaqartinneqanngilaq tunngavigissallugu unnerluutigineqartup pinerlineqartoq nuluatigut marloriarluni savimmik kapigaa. Nunatta eqqartuussisuuneqarfiata taamaattumik unnerluutigineqartoq pisimasumi 3-mi pisuutippaa.

Pineqaatissiissut pillugu
Nunatta eqqartuussisuuneqarfiata pineqaatissiissut naleqquttumik uuttorneqarsimasoraa. Nunatta eqqartuussisuuneqarfiata taamaalilluni pingaarnertut innersuussutigaa unnerluutigineqartoq pisimasuni pingasuni nakuusersimasutut pisuutinneqarsimasoq, suliami pisimasuni 2-mi 3-milu assut peqqarniitsumik nakuusertoqarsimasoq, tamatumalu kingunerisaanik suliarinninnikkut pilertortumik katsorsaasoqartariaqalersoq, bakterianut akiuussutissanik sivisuumik katsorsaasoqartariaqartoq napparsimmavimmullu unitsitsisoqartariaqartoq (pisimasoq 2) mersorneqartariaqartunillu savimmik kapisilluni aqqunaasoqartoq (pisimasoq 3), pisimasumili 1-imi nakuuserneq ima sakkortutigisimavoq pinerlineqartup najungasua napilluni napparsimmavimmullu unitsinneqartariaqarluni. 

Pisimasuni nakuusernerit peqqarniissusii aqqunarnerillu eqqarsaatigalugit pineqaatissiissutip utaqqisitanngortinnissaanut tunngavissaqanngilaq. Aamma suliami pisimasumi 1-imi piffissap pinerluffiusup ukiut pingasut sinnerlugit kingorna nunatta eqqartuussisuuneqarfiani suliareqqitassanngortitsinermi inaarutaasumik aatsaat aalajangiivigineqarnera pineqaatissiissutip utaqqisitanngortinneqarnissaanik kinguneqarsinnaanngilaq. Tassunga atatillugu nunatta eqqartuussisuuneqarfiata maluginiarpaa unnerluutigineqartoq suliami pisimasumi 1-imi nakuusernermut atatillugu politiit assigisaallu akuliutsinneqartut nalunngikkaluarlugu assut peqqarniitsumik sualuttumillu nakuusertarnini ingerlatiinnaraa 2022-mi februaarimiinnaanngitsoq kisianni aamma ukiup affaata kingorna 2022-mi oktobarimi. 

Nunatta eqqartuussisuuneqarfiata taamaattumik eqqartuussisoqarfiup eqqartuussutaa aalajangersarpaa. 

Suliap normua: K 086/24

Eqqartuussissutit nassuiaatillu (kingusinneruskkut ikkunneqarumaarput)