25 jun 2024
Nunatta Eqqartuussisuuneqarfia
Unnerluutigineqartoq pinngitsuutinneqarluni - K 013/24
Angut 54-nik ukiulik qaammatini pingasuni pineqaatissinneqarsimasunut inissiisarfimmiittussanngortitatut eqqartuunneqarpoq. Taassuma arnaq immiaaqqap puuanik anaasisimagamiuk, taamaalilluni kingorna napparsimmavimmi misissorneqarluni arlalinnillu kilulinnik mersorneqarluni.
Eqqartuussissut Nunatta Eqqartuussisuuneqarfianit oqaatigineqarpoq ulloq 25. juuni 2024
Akerlilerneqarsinnaanngilaq pinerlineqartoq ulloq 19. maaji 2021 qaamigut sipisoortoq tamatumalu kingorna napparsimmavimmi misissorneqartoq arlalinnillu kilulinnik mersorneqartoq.
Pinerlineqartoq unnerluutigineqartorlu ullormi pineqartumi aalakoornartumit sunnersimaneqarput. Ilisimannittoq, unnerluutigineqartup aamma pinerlineqartup inaanni ”nangikkiartoq”, aamma aalakoorpoq. Ilisimannittoq nassuiaavoq unnerluutigineqartup pinerlineqartullu akornganni nakuuserneq najuuffiginagu, taamatuttaaq ilisimannittoq nassuiaavoq ilisimannittup ini qimammagu unnerluutigineqartoq sinittoq. Politiassistentip nassuiaanerata kingorna tunngavissaqartinneqarpoq unnerluutigineqartoq inimiinngitsoq politiassistenti najukkamukaqquneqarmat.
Pinerlineqartoq aamma nunatta eqqartuussisuuneqarfiani nassuiaavoq ulloq 19. maaji 2021 unnerluutigineqartumit ataasiarluni ajanneqaannarluni tassungalu atatillugu naneruuserfimmut kanngussammut igaffimmi nerrivimmiittumut tulluni. Pinerlineqartup eqqartuussisoqarfimmi nunattalu eqqartuussisuuneqarfiani nassuiaatimi napparsimmavimmi nakorsamut ullorlu 19. maaji 2021 politiinit apersorneqarnermini paasissutissiissutigisaminut sanilliullugu allaaneruneranut tunuliaqutaasoq sukumiisumik nassuiarpaa, tassunga ilanngullugu unnerluutigineqartup ersiginera nassuiaatiminik allannguinerminut pissutaanngitsoq.
Unnuami pineqartumi pinerlineqartup nakuuserfigineqarnera ilisimannittunit najuuffigineqanngilaq. Tamanna uppernarsaatillu saqqummiunneqartut tunngavigalugit nunatta eqqartuussisuuneqarfiata pinerlunnermik suliami eqqartuussinissamut pisariaqartumik uppernarsarneqarsorinngilaa unnerluussissutigineqartoq, puiaasamik assigisaanilluunniit anaasinermut tunngasoq, malillugu unnerluutigineqartup eqqartuunnissaanut naammaginartumik tunngavissaqanngitsoq, tak. pinerluttulerinermi inatsimmi § 88. Tamanna tun-ngavigalugu suliallu nunatta eqqartuussisuuneqarfianut saqqummiunneqarnera malillugu unnerluutigineqartoq pinngitsuutinneqarpoq.
Eqqartuussisoqarfiup eqqartuussutaa allanngortinneqarpoq taamaalilluni unnerluutigineqartoq pinngitsuutinneqarluni.
Suliap normua: K 013/24
Eqqartuussissutit nassuiaatillu (kingusinnerusukkut ikkunneqarumaarput)