24 apr 2024
Nunatta Eqqartuussisuuneqarfia
Unnerluutigineqartup 15.000 kr.-it arnamut akilissavai - K 180/23
Angut 23-nik ukiulik inuiaqatigiinni sulisinneqassaaq nalunaaquttap akunneri 80-t sivisunerpaaffiliussap qaammatit arfineq pingasunut ingerlaneranni naammassineqartussamik. Arnaq sinittoq kanngutsaattuliorfigisimagamiuk qanoq ilioriarsinnaajunnaaqqanini pissutigalugu akiuussinnaanngitsoq.
Eqqartuussissut Nunatta Eqqartuussisuuneqarfianit oqaatigineqarpoq ulloq 24. april 2024
Arnaq nassuiaavoq iterluni unnerluutigineqartup trussimi iluisigut kinguaassiuutimigut attuualaaraani. Nassuiaavoq inussaminik oqaasamigut attoraani inussanilu aalatikkai tamannalu – eqqumanermini – minutsip ataatsip missaanik sivisussuseqartoq.
Arnap unnerluutigineqartumit attuualaarneqarnerminik nassuiaataa taperserneqarpoq akunnerminni chatikkut attaveqaqatigiinnerannik saqqummiussamit aammali unnerluutigineqartup eqqartuussisoqarfimmi nassuiaaneranit, tamatumani nassuerpoq ulloq 1. januaari 2022 arnaq sanileralugu iterami g-strengiisa iluisigut nalikkaavatigut attuualaarsimallugu.
Tamanna tunngavigalugu aamma unnerluutigineqartumit apersuinermik nalunaarusiami allassimammat politiinut nassuiaasimasoq arnaq sinittoq pulaffigisimallugu nunatta eqqartuussisuuneqarfiata uppernarsarneqarsoraa unnerluutigineqartup arnamik attuualaarinninnera pinerluttulerinermi inatsimmi taamani atuuttumi § 77, imm. 1, nr. 2-mik (massakkut atuuttumi § 77, imm. 1-imik) unioqqutitsinerusoq, taamaattumillu unnerluussissutigineqartumi pisuusoq, kisianni uppernarsarneqanngilaq unnerluutigineqartup inussani arnap utsuanut manngukkai, aamma pisimasoq ilaatigut iliuuserineqarpoq arnap eqqumanerani, kisianni ilaatigut qanoq ilioriarsinnaajunnaaqqanini pissutigalugu akiuussinnaannginnerani.
Eqqartuussisoqarfiup pineqaatissiissutitut aalajangersagaa nunatta eqqartuussisuuneqarfiata isumaqatigaa. Nunatta eqqartuussisuuneqarfiata taamaalilluni tunngavigivaa pisimasoq ukiut marluk matuma siorna iliuuserineqartoq aamma unnerluutigineqartoq siusinnerusukkut pineqaatissinneqarsimanngitsoq.
Pisimasup qanoq ittuussusia eqqarsaatigalugu arnamut mittatilliineq pillugu taarsiissutit Eqqartuussiviit Qullersaata ulloq 29. oktobari 2018 (U.2019.497) eqqartuussutaanut naapertuuttumik 15.000 kr.-inut aalajangersarneqarput.
Eqqartuussisoqarfiup pineqaatissiissut pillugu aalajangiussaa aalajangersarneqarpoq.
Suliap normua: K 180/23
Eqqartuussissutit nassuiaatillu (kingusinnerusukkut ikkunneqarumaarput)