09 apr 2024
Nunatta Eqqartuussisuuneqarfia
Pineqaatissiissummik eqqartuunnagu aalajangiiffigineqartoq - K 024/24
Angut 38-nik ukiulik utaqqisitamik eqqartuunneqarpoq Pineqaatissinneqarsimasunut Inissiisarfimmiittussanngorlugu ulluni 50-ini. Unnerluunneqartup pinerlineqartoq vodkap puuanik ataasiarluni avaavatigut anaasimagamiuk kiinaatigullu pingasoriarluni sisamariarluniluunniit tillussimagamiuk.
Eqqartuussissut Nunatta Eqqartuussisuuneqarfianit oqaatigineqarpoq ulloq 9. april 2024
Unnerluutigineqartoq nassuerpoq festernermi illumi pania, vodkap puuanik avaavatigut anaasimallugu. Nassuiaavoq arnap vodkap puuanik niaqqumigut anaasinerata kingorna taama iliorluni. Pinerlineqartup nakuuseqqaalerneranik nassuiaanera ilisimannittup pisup qaammatip ataatsip kingorna politiinut nassuiaataanit taperserneqarpoq.
Nunatta eqqartuussisuuneqarfia isumaqarpoq pisimasoq imminut illersorneq pillugu aalajangersakkamut atassuserneqarsinnaanngitsoq. Nunatta eqqartuussisuuneqarfiata taamaalilluni tunngavigivaa pinerlineqartup vodkap puuanik anaareermani unnerluutigineqartup vodkap puuanik arsaaraa aamma unnerluutigineqartup pinerlineqartullu timikkut assigiinnginnerujussuat eqqarsaatigalugu nakuuserneq sakkortuumik saassussineq akiorniarlugu pinngitsoortinniarluguluunniit pisariaqartutut isigineqarsinnaanngitsoq.
Tillussineq pillugu unnerluussissutigineqartumut tunngatillugu nunatta eqqartuussisuuneqarfia isumaqarpoq akerleriittumik nassuiaanerit eqqarsaatigalugit aamma pinerlineqartoq pisup kingorna aatsaat ullut marluk qaangiuttut napparsimmavimmi misissortimmat eqqartuussinissamut pisariaqartumik uppernarsarneqanngitsoq unnerluutigineqartoq vodkap puuanik anaasinerup kingorna allatigut pinerlineqartumut nakuusertoq.
Unnerluutigineqartoq tamanna tunngavigalugu pinerluttulerinermi inatsimmi § 88-imik unioqqutitsisimasutut pisuutinneqarpoq pinerlineqartup vodkap puuanik niaquatigut anaaneratigut.
Aqqunaalluni nakuusernerup pineqarnera apeqqutaatinnagu nunatta eqqartuussisuuneqarfia pingaarnertut piffissap suliamik suliarinninnermut atorneqartup sivisoorujussuunera, unnerluutigineqartup atugaanik pissuteqanngitsoq, pisimasup unnerluutigineqartumut assingusumik nakuusernerup nanginneratut iliuuserineqarnera siusinnerusukkullu pineqaatissiissummik eqqartuussaasimannginnera eqqarsaatigalugit isumaqarpoq suliaq pinerluttulerinermi inatsimmi § 121, imm. 2 naapertorlugu unnerluutigineqartoq pineqaatissiissummik eqqartuunnagu aalajangiiffigineqarsinnaasoq.
Eqqartuussisoqarfiup eqqartuussutaa allanngortinneqarpoq taamaalilluni unnerluutigineqartoq pineqaatissiissummik eqqartuussaatinnagu.
Suliap normua: K 024/24
Eqqartuussissutit nassuiaatillu (kingusinneruskkut ikkunneqarumaarput)