12 apr 2024
Nunatta Eqqartuussisuuneqarfia
Pineqaatissiissut eqqartuussissutigineqartoq utaqqisitanngorluni -K 226/23
Angut 66-nik ukiulik Qaasuitsumit qaammatini marlunni inissiisarfimmiitsinneqartussatut eqqartuunneqarpoq. Angummik allamik nakuuserfiginnilluni kiinaatigut tilluarlugu aamma timaatigut niaquatigullu tukertarlugu isimmittarlugulu.
Eqqartuussissut Nunatta Eqqartuussisuuneqarfianit oqaatigineqarpoq ulloq 12. april 2024
Pinerlineqartoq nassuiaavoq ulloq 21. decembari 2021 nakuuserfigineqarluni kiinnakkut tilluartinnikkut aamma timikkut niaqqukkullu tukertartinnikkut isimmittartinnikkullu. Napparsimmavimmit paasissutissani allassimavoq pinerlineqartoq unnuk taanna napparsimmavimmut saaffiginnittoq aqqunarninilu pillugit katsorsarneqartoq aamma kiinnamigut, talermigut, tuimigut kiatimigullu aqqunarnermigut assilisittoq. Pinerlineqartoq nassuiaavoq unnerluutigineqartoq pissutissaqarani saassukkaani nakuuserfigigaanilu.
Pinerlineqartoq nangilluni nassuiaavoq ulloq 22. decembari 2021 unnerluutigineqartumit saassutseqqilluni, tamatumanilu torlummigut sekundini 5-10 tiguneqarluni. Nalunaaruteqarnermik nalunaarusiami allassimavoq pisimasup iliuuserineqarnerata kinguninngua assilineqarsimasoq.
Pisimasumi 1-imi nakuusernermut tunngatillugu unnerluutigineqartoq eqqartuussisoqarfimmut nassuiaavoq taamaaliorluni angutip ajani annersartarmagu. Nunatta eqqartuussisuuneqarfianut nassuiaavoq ulloq taanna silaarunnissami tungaanut imigassartorsimalluni silaqarlunilu nakuusersimanavianngikkaluarluni. Unnerluutigineqartoq pisimasumut 2-mut tunngatillugu nunatta eqqartuussisuuneqarfianut nassuiaavoq ulloq 22. decembari 2021 arlaannik pisoqanngitsoq. Ullorli 22. decembari 2021 apersuinermik nalunaarusiami allassimavoq unnerluutigineqartup nassuerutigigaa pinerlineqartoq torluatigut tigusimallugu.
Tamanna tunngavigalugu, pisimasut iliuuserineqarnerisa kinguninngua nalunaarutigineqarmata, aamma pinerlineqartup aqqunarnerisa takuneqartut nassuiaasimanermisut nakuuserfigineqarsimaneranik tapersiinerat eqqarsaatigalugu nunatta eqqartuussisuuneqarfiata unnerluutigineqartup pisimasumi 1-imi allaatigineqartutut nakuusersimasutut pisuutippaa, kisianni pinerlineqartoq natermut miloriunneqarsimanngitsutut, taamaattumik unnerluutigineqartoq unnerluussissutip immikkoortuani tamatumani pinngitsuutinneqarpoq.
Pisimasumut 2-mut tunngatillugu unnerluutigineqartup nassuiaanera tunngavigalugu nunatta eqqartuussisuuneqarfiata uppernarsarneqarsoraa unnerluutigineqartup pinerlineqartoq torluatigut sakkortuumik tigugaa, unnerluutigineqartulli tamatuma kingorna toqqusassinngikkaa. Tamatumani unnerluutigineqartoq taamaattumik pinerluttulerinermi inatsimmi § 88-imik unioqqutitsisimaneq pillugu eqqartuunneqarpoq.
Nakuusernerup annertussusia, aamma pisimasut marluk pineqarnerat, kisianni aamma un-nerluutigineqartup siusinnerusukkut pineqaatissinneqarsimannginnera piffissallu suliamik suliarinninnermut atorneqartoq eqqarsaatigalugit nunatta eqqartuussisuuneqarfiata pineqaatissiissut ukiumi ataatsimi piffissatut misiliutilimmi ulluni 60-ini utaqqisitamik inissiisarfimmiittunngortitsinertut aalajangersarpaa.
Eqqartuussisoqarfiup aalajangiussaa allanngortinneqarpoq taamaalilluni pineqaatissiissut eqqartuussissutigineqartoq utaqqisitanngorluni. Ukiup ataatsip piffissatut misiliutaasup kingorna pineqaatissiissummik naammassinninneq kinguartinneqassalluni atorunnaarsinneqassaaq.
Suliap normua: K 226/23
Eqqartuussissutit nassuiaatillu (kingusinnerusukkut ikkunneqassapput)