Gå til sidens indhold

Nunatta Eqqartuussisuuneqarfia

17 mar 2022

Nunatta Eqqartuussisuuneqarfia

Unnerluutigineqartoq pisimasoq 2-mi pinngitsuutinneqarpoq - K 282/21

Angut 51-nik ukiulik eqqartuunneqarpoq qaammatini arfilinni pineq. inissiisarfimmiittussanngortinneqarluni, meeqqamik 11-nik ukiulimmik kinguaassiutitigut kannguttaatsuliorfiginnimmat, arlaleriarluni iviangiasigut, nuluasigut attuasaramiuk aamma kinguaassiutaata nalaatigut atisaata qaavisigut.

Eqqartuussissut Nunatta Eqqartuussisuuneqarfianit oqaatigineqarpoq ulloq 7. Marts 2022.

Amerlanerussuteqartut isumaat malillugu eqqartuussuteqartoqarpoq, taamaalilluni unnerluutigineqartoq pinngitsuutinneqarluni suliami pisimasup aappaani kannguttaatsuliorfiginninnermi.

Pineqaatissiinermi aallarniutigalugu oqaatigineqassaaq, aallaavittut pinerluutit taamatut isikkullit aalajangersarneqartarmata pineqaatissinneqarsimasunut inissiisarfimmiittussanngortinneqarnermik. Sukumiisumik nalilersuereernermi aallaavik tamanna saneqqunneqarsinnaavoq pissutsinik immikkut illuinnartunik peqarpat. Nunatta eqqartuussisuuneqarfia isumaqarpoq suliami matumani immikkut illuinnartumik soqanngitsoq aallaavittut pineqaatissiissutip aalajangersarneqarneranik saneqqutsissutaasinnaasumik, pisimasup pissusiatigut, unnerluutigineqartup inuttut atugaasigut imaluunniit piffissaq suliap suliarineqarneratigut.

Tamatumani eqqartuussisuuneqarfiup immikkut pingaartippaa suliap pissusia aamma unnerluutigineqartoq siusinnerusukkut assingusumik pinerluuteqarnermigut pineqaatissinneqartareersimammat.

Nunatta eqqartuussisuuneqarfiata sakkukillisaatitut isumaqarfiginngilaa pisimasut nalunaarutigineqarneri ukiunik qulinik sioqqullugu pisimasuuneri, tassami pisimasut aatsaat nalunaarutigineqarsimammata august 2020-mi. Tamatumunnga nunatta eqqartuussisuuneqarfianit oqaatigineqassaaq suliani assingusuni pinerliinerup kingornatigut ukiut arlallit qaangiutereersut nalunaarutiginnittarneq takornartaanngimmat, pinerlineqartoq naapertuutinngitsuliorfigineqarnermi nalaani ima ukiukitsigisimappat, aatsaallu sapiissuseqalertarmata naapertuutinngitsuliorfigineqarnerit nalunaarutiginissaannut pinerlineqartoq utoqqaaneruleraangat imaluunniit inersimasunngoraangat.

Taamaattumik nunatta eqqartuussisuuneqarfianit pineqaatissiineq naapertuuttumik sivisussusilerneqarpoq qaammatini arfilinni pineqaatissinneqarsimasunut inissiisarfimmittussanngortinneqarnermik. Tamatumani nunatta eqqartuussisuuneqarfianit pingaartinneqarpoq suliap nalunaarutigineqarneraniit nunatta eqqartuussisuuneqarfiani suliarineqarnerani piffissap sivisusimanera.

Uppernarsaasiinermi inerniliunneqartut tunngavigalugit eqqartuussisut siulittaasua isumaqarpoq mitagaanermut ajunngitsorsiassat apparneqassasut 60.000 kr.-inut.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, unnerluutigineqartoq pisimasoq 2-mi pinngitsuutinneqarpoq aamma mitagaanermut ajunngitsorsiassat appartinneqarput 60.000 kr.-inut.

 

Suliap normua: K 282/21

Eqqartuussissutit nassuiaatillu