Ulluni 40-ni pineq. inissiisarfimmittussanngortinneqarluni - K 262/21

Eqqartuussissut Nunatta Eqqartuussisuuneqarfianit oqaatigineqarpoq ulloq 15. februar 2022.

Nunatta eqqartuussisuuneqarfiata uppernarsineqartutut isumaqarfigivaa unnerluutigineqartoq kannguttaatsuliorfiginnissimasoq ataasiakkaatigut arnaq pineqartoq atisaata qaavisigut iviangiisigut attulaarinninnermi suliami pisimasumi siullermi oqaatigineqartutut. Eqqartuussisuuneqarfik isumaqarpoq qularnaatsumik uppernarsineqanngitsoq eqqartuussutaasinnaasumik, unnerluutigineqartoq siunertaqarsimasoq kannguttaatsuliorfiginnissalluni arnap nuluisigut attuaannilluni. Taamaalilluni eqqartuussisoqarfiup pinngitsuutitsinera iviangiisigut atisaata qaavisigut attualaarinninneq suliareqqitassanngortinneqanngimmat unnerluutigineqartoq suliami unnerluutip pisimasuani siullermi atisat qaavisigut attualaarinninnermut tunngasumi pinngitsuutinneqarpoq.

Uppernarsaasiissutigineqartunik nalilersuinermi suliami pisimasumi siullermi eqqartuussisuuneqarfiup pingaartumik pingaartippaa, arnap assigiinngiiaartunik nassuiaateqarnera, aamma kingullermik arnap apersorneqarnerani nammineerluni nassuiaatiginngilaa ersarissumik iviangiisa attuaasimanerata saniatigut tiinganiarnertut ittumik attuuaneqarsimanera.

Taamatullu aamma eqqartuussisuuneqarfik isumaqarpoq qularnaatsumik uppernarsineqanngitsoq eqqartuussutaasinnaasumik, unnerluutigineqartoq suliap pisimasuata aappaani oqaatigineqartutut nakuusersimanersoq. Eqqartuussisuuneqarfiup pingaartumik pingaartippaa arnap ersarissumik sukumiisumillu nassuiaatigimmagu, pisimasumi oqaatigineqartumi susoqarsimanersoq, qangalu pisimasoq pisimanersoq. Taamatullu aamma arnap nassuiaanera pingaarnertigut assigiinngissuteqarpoq ilisimannittup pisimasoq pillugu nassuiaaneraniit.

Suliami pisimasut pingajuanni eqqartuussisuuneqarfimmi eqqartuussisooqataasut marluk isumaqarput qularnaatsumik uppernarsineqanngitsoq eqqartuussutaasinnaasinnaasumik, unnerluutigineqartoq unnerluussissummi oqaatigineqartutut nakuusersimasoq. Eqqartuussisooqataasut taakkua marluk pingaartumik pingaartissimavaat pineqartup arnap pisimasoq pillugu assigiinngisitaartumik nassuiaateqarnera, tassunga ilaatinneqarluni qanoq nammineq aamma unnerluutigineqartoq imminnut inissisimanerat pillugu. Taamatullu aamma arnap nassuiaanera pingaarnertigut ilisimannittup nassuiaaneranit assigiinngissuteqarpoq. Taamaalillutik eqqartuussisooqataasut taakkua eqqarsarnartoqartippaat unnerluutigineqartup nassuiaanerata illekartinneqarnissa, tassa arnaq pineqartoq eqqortoorsimammagu mobiliata utertinniarneranut atatillugu.

Eqqartuussisooqataasoq ataaseq isumaqarpoq eqqartuussisoqarfiup uppernarsaasiilluni inerniliinera suliap pisimasuata pingajuani atuuttussanngortinneqassasoq, eqqartuussisoqarfiup tunngavilersuutai tunngavigalugit. Eqqartuussut oqaatigineqarpoq amerlanerussuteqartut isumaat malillugu.

Uppernarsaasiilluni inerniliunneqartoq tunngavigalugu pineqaatissiissut aalajangersarneqarpoq utaqqisitamik ulluni 40-ni pineqaatissinneqarsimasunut inissiisarfimmiittussanngortinneqarnermik ukiumik ataatsimik misiligaaffilikkamik, tak. pinerluttulerinermi inatsimmi § 129, imm. 1 aamma 2, tak. § 84, imm. 1. Eqqartuussisuuneqarfiup pingaartumik pingaartippaa iviangikkut attualaarinninneq atisat qaavisigut pisimanera, ilaquttamit qanigisamit, arnamik pineqartumit utoqqaanerungaatsiartumit, taassumalu taanna tatigisussaagaluarmagu.

Mitagaaanermut ajunngitsorsiassat aalajangersarneqarput naapertuilluanngitsuliornerup pissusia malillugu suliani assingusuni periuseq malillugu 5.000 kr.-inut.

Unnerluutigineqartoq eqqartuunneqarpoq utaqqisitamik ulluni 40-ni pineqaatissinneqarsimasunut inissiisarfimmittussanngortinneqarluni. Pineqaatissiissut kinguartinneqarpoq atorunnaassallunilu ukioq ataaseq misiligaaffioreerpat.

Suliap normua: K 262/21

Eqqartuussissutit nassuiaatillu