17 feb 2022
Nunatta Eqqartuussisuuneqarfia
Qaammatini 4-ni pineq. inissiisarfimmiittussanngortinneqarluni - K 257/21
Angut 22-nik ukiulik Qeq. Eqq. eqqartuunneqarpoq qaamatini 6-ni inissiisarfimmiittussanngortillugu, inooqatigisimasani kiinaatigut marloriarlugu tillukkamiuk, kingornalu qungasiatigut qimikkaluarlugu, aammalu angut kiinaatigut niaquatiulluunniit pingasoriarluni tillukkamiuk, kingornalu uppisillugu.
Eqqartuussissut Nunatta Eqqartuussisuuneqarfianit oqaatigineqarpoq ulloq 17. februar 2022.
Unnerluutigineqartoq eqqartuussisoqarfimmit pisuutinneqarpoq pinerluttulerinermi inatsimmi § 88-mik (nakuuserneq) ulloq 5. december 2020, arnaq pineqartoq kiinaatigut marloriarlugu tilluinermut aamma qungasiatigut toqqusassiinermut, aamma angut pineqartoq kiinaatigut pingasoriarlugu tilluinermut kiinaatigut/niaquatigut, uppititsinermullu.
Nunatta eqqartuussisuuneqarfiani pineqarpoq apeqqut pineqaatissiissummik sivisussusiliineq.
Eqqartuusseqataasut marluk isumaqarput toqqusassiineq nakuusernerusoq peqqarniitsoq, aallaavittullu pineqaatissinneqarsimasunut inissiisarfimmiittussanngortinnermik kinguneqartinneqartartoq. Ataatsimut nalilersuereernermi unnerluutigineqartup siusinnerusukkut pineqaatissinneqarsimaneranik aamma pinerluutigisap pissusianik amma annertussusianik, eqqartuussisut taakkua isumaqarput pineqaatissiissummik sivisussusiliineq – naak unnerluutigineqartoq inuttut atugarissaartuugaluartoq – naapertuuttuusoq qaammatini sisamani pineqaatissinneqarsimasunut inissiisarfimmiittussanngortinneqarnissamik aalajangersaaffigineqarnissaa.
Eqqartuussisooqataasut taakkua marluk pingaartumik pingaartippaat, unnerluutigineqartoq siusinnersukkut nakuusernermut eqqartuussaanikuummat, tassunga ilanngunneqarluni sukkasuumik assinganik iliuuseqaqqissimaneq, ajoqusernerit nakuusernerup kingunerisai, aamma nakuusernerup ilaani toqqusassiisoqarnera, aamma pineqarmata kiinnakkut/niaqqukkut tilluaanerit arlallit inunnut marlunnut. Tamanna tunngavigalugu eqqartuussisooqataasut taakkua marluk isumaqarput pineqaatissiissut utaqqisitanngortinneqarsinnaanngitsoq imaluunniit aalajangersaasoqarsinnaanngitsoq piumasaqaatitalikkamik inuiaqatigiinni sulisitaanermik. Pissutsillu imaannerat, nakuusernerup pisimanera unnerluutigineqartup aappakuni allamik tutitaqarneranik takunnissimanera allatut inerniliissutaasinnaanngilaq.
Eqqartuussisumit ataatsimit eqqartuussisoqarfiup eqqartuussutigalugu pineqaatissiinera naapertuuttutut isumaqarfigineqarpoq, tassanilu pingaartinneqarluni unnerluutigineqartup inuttut atugarissaartuunera.
Amerlanerussuteqartut isumaat malillugu eqqartuussut oqaatigineqarpoq.
Eqqartuussisoqarfiup eqqartuussutaa allanngortinneqarpoq imaalillugu, unnerluutigineqartoq eqqartuunneqarpoq qaammatini sisamani pineqaatissinneqarsimasunut inissiisarfimmiittussanngortinneqarluni.
Suliap normua: K 257/21
Eqqartuussissutit nassuiaatillu