Ulluni 30-ni pineq. inissiisarfimmiittussanngortinneqarluni - K 003/22

Eqqartuussissut Nunatta Eqqartuussisuuneqarfianit oqaatigineqarpoq ulloq 11. februar 2022.

Ilisimannittoq nassuiaavoq unnerluutigineqartumi fiistimiit ingerlagami unnerluutigineqartoq aamma niviarsiaraq illumi kisimiilersimasut.

Ilisimannittoq aamma nassuiaavoq, illu qimakkamiuk unnerluutigineqartoq aamma niviarsiaraq atisaqarsimasut. Ilisimannittoq nassuiaavoq, niviarsiaqqap illuanut apuukkami matu isertarfik parnaaqqasoq, suli unnerluutigineqartoq aamma niviarsiaraq illumi kisimiittut.

Ilisimannittoq aamma nassuiaavoq tamatuma unnerluutigineqartoq aamma niviarsiaraq uppatimikkut atisaqarsimanngitsut. Taamaalilluni eqqartuussisuuneqarfimmit uppernarsineqartutut isumaqarfigineqarpoq unnerluutigineqartup niviarsiaraq atisaajarsimagaa unnerluussissummi oqaatigineqartutut.

Nunatta eqqartuussisuuneqarfia isumaqarpoq qularnaatsumik uppernarsineqanngitsoq eqqartuussutaasinnaasumik unnerluutigineqartup niviarsiaraq atoqatigeriaraluarsimagaa. Tamatumani pingaartumik pingaartinneqarpoq ilisimannittut apersorneqartut arlaannaalluunniit nassuiaanngimmat unnerluutigineqartoq iluatsittumik atoqatiginneriaraluarsimanersoq.

Unnerluussissummi annerusumik allaaserineqarsimanngilaq, qanoq unnerluutigineqartoq iliorsimanersoq imaluunniit ilioriaraluarsimanersoq kinguaassiutitigut allatut atoqatiginnilluni, taamaattumik aamma pinngitsuutinneqarpoq pinngitsaaliinermut kinguaasiutitigut allatut atoqatiginninnermi.

Uppernarsaasiissutit inernerata kingunerisaanik pisimasoq pinerluttulerinermi inatsimmi § 84, imm. 1-nngortinneqarpoq, kannguttaatsuliorfiginninneq.

Pineqaatissiissut aalajangersarneqarpoq utaqqisitamik ulluni 30-ni pineqaatissinneqarsimasunut inissiisarfimmiittussanngortinneqarnermik ukiumik ataatsimik misiligaaffilikkamik, tak. pinerluttulerinermi inatsimmi § 84, imm. 1, tak. § 129, imm. 1 aamma 2. Tamatumani pingaartumik eqqartuussisuuneqarfimmit pingaartinneqarpoq kannguttaatsuliorfiginnittarnermi peqqarniinnerusutut inissinneqarmat, niviarsiaraq 15-it inorlugit ukioqarmat kannguttaatsuliorfigineqarami, aamma unnerluutigineqartup aamma niviarsiaqqap akornanni ukiumikkut nikinganerat annertummat.

Kannguttaatsuliorfiginninnerup peqqarniissusia isiginiarneqarluni aamma mitagaanermut ajunngitsorsiassaliisarnermi periuseq malillugu niviarsiaqqap mitagaanerminut ajunngitsorsiassalerneqassaaq 5.000 kr.-inik.

Unnerluutigineqartoq eqqartuunneqarpoq utaqqisitamik ulluni 30-ni pineqaatissinneqarsimasunut inissiisarfimmiittussanngortinneqarluni. Pineqaatissiissut kinguartinneqarpoq ukiumik ataatsimik misiligaaffilikkamik atorunnaassallunilu unnerluutigineqartoq misiligaaffiup ingerlanerani nutaamik inatsisinik unioqqutitseqqinngippat.

Suliap normua: K 003/22

Eqqartuussissutit nassuiaatillu