Nakuuserneq - K 066/21

Eqqartuussissut Nunatta Eqqartuussisuuneqarfianit oqaatigineqarpoq ulloq 7. april 2021. 

Unnerluutigineqartoq eqqartuussisoqarfimmit eqqartuunneqarpoq arnamut pineqartumut nakuusersimanermut piliarineqarsimasoq ulloq 22. december 2018-imi. Nakuusernerit tassaasimapput sakkortuumik isattaanerit arlallit aamma kiinnakkut tilluuanerit, taliatigut talerperlikkut isimmitsinerit arlallit aamma niaquatigut annersaanerit saviup savissartaanik. Nakuusernerup kingunerisimavai qinngap napinera, niaqqup saarngata qaavatigut aqqunarneq, aamma pullannerit tilluusallu. Pisuunermik apeqqutitaa nunatta eqqartuussisuuneqarfianut suliareqqitassanngortinneqanngilaq.

Nunatta eqqartuussisuuneqarfiata pineqaatissiissut allanngortippaa nalunaqquttap akunnerini 70-ni inuiaqatigiinni sulisitassanngortitsinermik. Inuiaqatigiinni sulisitaanissaq sivisunerpaaffilerneqarpoq qaammatit arfinillit iluanni pisussatut, aamma unnerluutigineqartoq ukiumi ataatsimi pinerluuteqarsimasunut isumaginnittoqarfimmiit nakkutigineqassaaq.

Nunatta eqqartuussisuuneqarfiata eqqartuussisoqarfik isumaqatigivaa suliami imatut isikkulimmi aallaavittut eqqartuussuteqartoqartariaqartoq utaqqisitaanngitsumik pineqaatissinneqarsimasunut inissiisarfimmiittussanngortitsinermik.

Suliami ersersinneqarpoq suliaq eqqartuussisoqarfimmut apuunneqarsimasoq ulloq 25. marts 2019-imi, oqaatigineqanngilaq tunngaviusinnaasumik isumaqartitsilersumik piffissaq suliap suliarineqarsimaneranut atorneqarsimasoq unnerluutigineqartup pisuusutigisimaneraa.

Isiginiarneqarlutik suliap peqqarniissusia aamma arnamut pineqartumut ajoqusiinerit annertussusiat sanilliunneqarluni piffissaq suliap suliarinearneranut atorneqarsimasoq, nunatta eqqartuussisuuneqarfia isumaqarpoq unnerluutigineqartoq eqqartuunneqassasoq inuiaqatigiinni sulisitaanermik, tak. pinerluttulerinermi inatsimmmi §141, tak. § 88, uniffik siulleq.

Unnerluutigineqartoq eqqartuunneqarpoq aningaasarsiaqaatiginagu inuiaqatigiinni sulitaassasoq nalunaaquttap akunneri 70-it, sulisitaanerlu naammassineqassaaq sivisunerpaaffiliussap qaammatit arfinillit iluanni. Unnerluutigineqartoq pinerluttunik isumaginnittoqarfimmit nakkutigisassanngortinneqarpoq ukiumi ataatsimi.

Suliap normua: K 066/21

Eqqartuussissutit nassuiaatillu