02 mar 2022
Nunatta Eqqartuussisuuneqarfia
Pineqaatissiissummik aalajangersaasoqanngilaq - K 103/20
Arnaq 38-nik ukiulik januar 2020-mi eqqartuussivimmi pisuutinneqarpoq pisiniartitsisoq marloriarlugu ersaatigut assamminik patikkamiuk aammalu ikiaroornartumik 12,9 gram-imik annertussusilimmik tuniniaqqitassaminik tigummiarami kiisalu aningaasat 950 kr.-nit tuniniarneraniik tigummiaramigit.
Eqqartuussissut Nunatta Eqqartuussisuuneqarfianit oqaatigineqarpoq ulloq 17. september 2020.
Unnerluutigineqartoq eqqartuussiviup eqqartuussutaani ulluni 40-ni utaqqisitamik pineqaatisinneqarsimasunut inissiisarfimmiittussanngorlugu eqqartuunneqarpoq kiisalu ilassutitut akiligassinneqarluni 1.200 kr.-nik pinerluttulerinermi inatsimmi § 88-mik ataasiarluni unioqqutitsisimammat kiisalu marloriarluni aanngajaarniutit pillugit inatsimmik unioqqutitsisimammat. Eqqartuussisuuneqarfiup suliaq sivisussusiliinermik suliareqqitassanngortitatut suliaraa.
Eqqartuussisuuneqarfiup suliap nalilersorneranut tunngatillugu pingaartumik suliap pisoqaassusaa tunngavilersuutigaa, kiisalu suliap suliarineqarnerani piffissaq atorneqartoq sivisooq unnerluutigineqartumut tutsinneqarsinnaanngitsoq. Suliaq taamaalilluni ukiuni pingasuni eqqartuussivimmiissimavoq suliallu suliarineqarnerani piffissaq sivisooq artorneqartoq naapertuutinngilluinnarpoq tamannalu unnerluutigineqartup taartisissutigissavaa.
Eqqartuussisuuneqarfiup ilanngullugu annertuumik pingaarutilittut nalilerpaa, unnerluutigineqartoq nammineerluni hashilerineq aqqusinermilu inuuneq qimassimammagu kiisalu 2017-mili imarsiornermik ilinniarfimmiissimammat ullumikkullu aalisartutut inuussutissarsiuteqarmat. Unnerluutigineqartup inuttut atugarisai pillugit paasissutissat pinerlunnerillu suussusaat suliallu pisoqaassusaa ilanngullugit, naliliinerup kingorna aalajangersarneqarpoq inatsinnik unioqqutitsinernut pineqaatissiisoqassanngitsoq, tak. pinerluttulerinermi inatsimmi § 121, imm. 2.
Unnerluutigineqartup siornatigut assingusumik pinerluuteqarsimanermut pineqaatissinneqarsimanera allatut inerneqartitsisinnaanngilaq.
Taamaakkaluartoq eqqartuussisoqarfiup arsaarinninnissamut aalajangersaanera atuuttussanngortinneqarpoq. Tamatumunnga maluginiarneqassaaq arsaarinninneq eqqartuussissutigoortitsinertut allatut isigineqassammat, taamaattumik tamanna attanneqarsinnaavoq naak allamik pineqaatissiisoqarnissaa aalajangersarneqanngikkaluartoq.
Ilanngullugu suliap suliarineqarnerani piffissaq sivisooq atorneqartoq eqqarsaatigalugu, eqqartuussivimmi eqqartuussisuuneqarfimmilu suliami aningaasartuutit naalagaaffiup karsianit akilerneqarnissaat naapertuunnerusorinarpoq.
Suliap normua: K 103/20
Eqqartuussissutit nassuiaatillu