Ukiuni marlunni inissiisarfimmiittussanngortitsineq - K 112/20

Eqqartuussissut Nunatta Eqqartuussisuuneqarfianit oqaatigineqarpoq ulloq 20. juli 2020.

Eqqartuussisut marluk eqqartuussivimmituulli isumaqarput, niviarsiaqqap pineqartup nassuiaataa uppernartuusoq. Eqqartuussisut taakku ingammik pingaartutut isigaat, nassuiaataani annikitsualuit ilanngussuunneqarsimasut, nassuiaataa aalajangersimasoq allannguinertaqanngitsoq, eqqartuussisuuneqarfimmilu apersorneqarami, nangaassuteqarani apeqqutinut tamaasa ingerlaannaq akisarlugit. Niviarsiaqqap nassuiaateqareerneratigut eqqartuussisut taakku isumaqarput, uppernarsineqartoq unnerluutigineqartup 2019-imi marsip naanerani aningaasarsereerluni niviarsiaraq sinittarfimmukaassimagaa inissiami Tuapannguani, perusunngitsorlu atisaajarsimallugu natermiittumullu madrassimut naqigussimasimallugu, tamatumalu kingorna qallersimallugu pinngitsaalillugulu atoqatigalugu. Tamatuma kingorna eqqartuussisut taakku isumaqarput unnerluutigineqartoq pisuusoq pinngitsaaliilluni atoqateqarsimasutut pinerluttulerinermi inatsisip §-iisa 77-iani, imm. 1-imi, no. 1, malillugu, unnerluussissummi allaaserineqartut malillugit, taamaattorli pinerluffiusut piffissaliussaq allanngortillugu.

Eqqartuussisut taakku isumaqarput, pinerlunnerup qanoq ittuunera ima ersaritsigisumik allaaserineqarsimasoq, allaat unnerluutigineqartoq suliami imminut illersornissaminut periarfissaqarsimasoq, naak pinerluffiusutut piffissaq allanneqarsimasoq kukkunertaqaraluartoq.

Eqqartuussisoq ataaseq isumaqarpoq, qularnaarlugu pisuutitsilluni eqqartuussinissamut uppernarsineqanngitsoq, unnerluutigineqartoq pinngitsaaliilluni atoqateqarsimasutut pisuunera. Eqqartuussisup taassuma ilaatigut pingaartutut isigaa, piffissap pinerluffiusup nalorninarnera, aammalu takussaasunik uppersaatissaqanngitsoq, niviarsiaqqap nassuiaataanut tapersersuisinnaasunik.

Amerlanerussuteqartut aalajangiinerat malillugu eqqartuussuteqassaaq.

Eqqartuussisuuneqarfik isumaqarpoq suliap peqqarniissusia eqqarsaatigalugu aammalu pineqaatisseeriaaseq atuuttoq pinngitsaalilluni atoqateqarnermut tunngasoq malillugu, pineqaatissiissut aalajangerneqassasoq inissiisarfimmut inissinneqarnermut ukiuni marlunni.

Tamatumani pingaartutut isigineqarpoq, niviarsiaraq inuusuttuaraammat, kisiannili atoqateqarnissamut ukiui inuunnatik. Tamatuma saniatigut sakkortulisaataasussatut isigineqarpoq niviarsiaqqap unnerluutigineqartullu ukiuisa assigiinnginnerujussuat kiisalu unnerluutigineqartoq niviarsiaqqap angaarimmagu, taamaalillunilu ilaqutaalluni, taamaattumillu niviarsiaraq illersortariaqarsimagaluarlugu, aammalu niviarsiaqqap tatigalugu isigisariaqarsimagaluarmagu.

Eqqartuussisuuneqarfik isumaqarpoq, mitagaasimanermut taarsiissutissatut eqqartuussiviup aalajangersimasaa pinngitsaaliilluni atoqateqarsimanermut suliani nalinginnaasumik aalajangersimasaa malillugu aalajangerneqarsimasoq, taamaattumillu eqqartuussisut mitagaasimanermut taarsiissutissatut aalajangigaa atortussanngortinneqarpoq.

Eqqartuussiviup eqqartuussutaa atortussanngortinneqarpoq allannguuteqartillugu, pineqaatissiissutaasoq allanngortinneqarpoq inissiisarfimmut inissinneqarnermut ukiuni marlunnni.

Suliap normua: K 112/20

Eqqartuussissutit nassuiaatillu