13 jun 2022
Nunatta Eqqartuussisuuneqarfia
Unioqqutitsilluni aalisarneq nakuusernermilu eqqartuussut - K012/20
Angut 43-nik ukiulik aalisarneq pillugu inatsimmik nakuusernerlu pillugu pinerluttulerinermik inatsisip § 88-ianik unioqqutitsisimasutut Qaasuitsup Eqqartuussisoqarfiani unnerluutigineqarpoq.
Aalisarneq pillugu inatsimmik unioqqutitsineq angallatip umiarsualivimmut pinnginnerani nalunaarsuilluni allattaavimmik immersuisimannginnermut tunngasuuvoq, taamatuttaaq qassutit mikivallaanik nigartallit atorlugit qaleralinniarsimanermut unnerluutigineqarpoq. Aalisarneq pillugu inatsimmik unioqqutitsinermut pinngitsuutinneqarpoq, unnerluussisussaatitaasunimmi ilaatigut uppernarsarneqanngilaq qassutit sorliit aalisanermi atorneqarsimanersut.
Ernerminik pukusuatigut assani isivillugu patitsisimanermigut nakuusermut pisuutinneqarpoq, tamatumunngalu mianersoqqussummik tunineqarpoq.
Eqqartuussut taanna unnerluussisussaatitaasunit eqqartuussisuuneqarfimmut suliareqqitassanngortinneqarpoq piumasaqaatigineqarluni unnerluussut naapertorlugu eqqartuussuteqartoqassasoq.
Eqqartuussisuuneqarfiup inerniliinera
Eqqartuussisuuneqarfiup eqqartuussut taanna tamakkiisumik atuuttussanngortippaa. Eqqartuussisuuneqarfiup oqaatigaa nalunaarsuilluni allattaaviup umiarsualivimmut tuniniaavimmulluunniit apuunissaq sioqqullugu immersorneqarnissaa piumasaqaataanngitsoq. Angallatip immalersimaneranik taamaattumillu umiarsualiviliaqquneqarsimaneranik paasissutissat eqqarsaatigalugit eqqartuussisuuneqarfik isumaqarpoq nalunaarsuilluni allattaaviup immersorneqarsimannginnera patsisissaqarluartoq, pisimasumullu tamatumunnga pinngitsuutippaat.
Nakuuserneq pillugu unnerluussut pineqaatissiissummik suliareqqitassanngortitsinertut taamaallaat eqqartuussisuuneqarfimmi suliarineqarpoq. Patitsinerup qanoq ittuunera, tamatumunnga ilanngullugu sakkortunngitsuusimanera unnerluutigineqartullu siornatigut pineqaatissinneqarsimannginnera, tunngavigalugit eqqartuussisoqarfiup mianersoqqussuteqarluni eqqartuussuteqarsimaneranik atuuttussanngortitsinissaq eqqartuussisuuneqarfiup eqqortuusorineruaa.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 11. juni 2020
Suliap normua: K 012/20
Nunatta Eqqartuussisuuneqarfiata eqqartuussutaa
Qaasuitsup eqqarruussiviata eqqartuussutaa
Nassuiaat