Pinngitsaaliilluni atoqateqarnermi pinngitsuutitsineq - K 240/19

Eqqartuussissut Nunatta Eqqartuussisuuneqarfianit oqaatigineqarpoq ulloq 12. juni 2020.

Uppernarsaasiinerup kingorna eqqartuussisuuneqarfiup nalilerpaa unnerluussisussaatitaasut oqaatigisaattut unnerluutigineqartup niviarsiaqqamut pineqartumut kinguaassiuutitigut kannguttaattuliorsimaneranik eqqartuussinissamut uppernarsaatissat pisariaqartinneqartut amigartut.

Eqqartuussisuuneqarfiup matumuuna tunngavilersuutigaa, niviarsiaqqap apersorneqarnermini nammineq piumassutsiminik kannguttaattuliornerit pillugit oqaluttuanngimmat utsummigullu attorneqarsimanini pillugu nassuiaanera, eqqartuussisuuneqarfiup paasinninnera malillugu politiip apersuisup tamatumunnga tunngatillugu aqutsisumik toqqaannartumillu apeqquteqarneranit tunngavilimmik pinngorsimasut. Taamaalilluni videokkut apersuinermi niviarsiaraq nassuiaavoq unnerluutigineqartup assani qanoq poorsimaneraa assanilu qipiup qaavanut inississimagaa, tassanngaanniillu apersuisup apeqqutiminik paaserusuppaa unnerluutigineqartup assani utsuanut manngunniarsarimmagu niviarsiaraq qanoq iliorsimanersoq. Eqqartuussisuuneqarfiup nalilerpaa videokkut immiussami arlaleriarluni naaggaagassanik anngaaginnagassanillu apeqquteqartoqartoq matumanilu niviarsiaqqap aalajangersimaqqissaartumut pissunnissaa siunertarineqarsimasoq. Apersuineq  eqqunngitsumik nassuiaanermik pilersitsinissamut tulluartumik ingerlanneqarsimavoq.

Ilanngullugu maluginiarneqarpoq niviarsiaraq videokkut apersorneqarnermi tassanerpiaq pisumut unnerluutigineqartumut allamut tunngasumut apersorneqarsimasortaaq apersuinerillu tulleriisiinnarlugit ingerlanneqarsimammata tamanna naapertuutinngitsoq.

Suliami unnerluussisussaatitaasut piumasaannut tapersiisunik teknikkikkut uppernarsaateqartinnagu videolu immiunneqarsimasoq qulaani allassimasut tunuliaqutaralugit uppernarsaatigineqarsinnaanngimmat, unnerluutigineqartoq pinngitsuutinneqassaaq. 

Suliap normua: K 240/19

Eqqartuussissutit nassuiaatillu