Utaqqisitamik pineqaatissinneqarpoq panimminut nakuusermat - K 203/20

Eqqartuussissut Nunatta Eqqartuussisuuneqarfianit oqaatigineqarpoq ulloq 25. november 2020.

Unnerluutigineqartoq Qeqqata Eqqartuussisoqarfianit ulloq 20. august 2020 eqqartuunneqarpoq ulluni 40-ni pineqaatissinneqarsimasunut inissiisarfimmiittussanngortinneqarluni pinerluttulerinermi inatsimmi § 88 nakuusernermut. Nunatta eqqartuussisuuneqarfiani suliaq taamaallaat suliarineqarpoq sivisussusiliilluni suliareqqitassanngortitsinertut.

Nunatta eqqartuussisuuneqarfia pineqaatissiissutissamik piviusorsiortumik nalilersuereerluni isumaqarpoq inuiaqatigiinni sulisitaanermik eqqartuussuteqartoqartariaqartoq, tamatumani pingaartinneqarluni aalajangiisuutinneqarlunilu unnerluutigineqartup ersarissumik innuttaasunut ilaalerseqinneqarnissamik pisariaqartitsinera. Tamatumani eqqornerpaatut isigineqarluni eqqartuussummi pimasaqaatitaliisoqarnissaanik atuipilunnermut katsorsagaanissamik aamma piumasaqaatitaliisoqarnissaanik tarnimigut katsorsagaanissaanik/peqqissarnissaanik, tak. pinerluttulerinermi inatsimmi § 141 aamma § 135, imm. 1, nr. 1, aamma nr. 3.

Pisimasoq, unnerluutigineqartup panimminut nakuusersimanera, aamma taamatut nakuusernermut 2015-imi eqqartuunneqarsimanera, pineqarluni kostip ipuanik ukiukitsumut anaalerisimaneq allatut inerniliissutaasinnaanngilaq.

Taamatullu eqqartuussisuuneqarfimmit pingaartinneqarpoq piffissaq suliap suliarineqarneranut atorneqarsimasoq tassa ukiut marlungajaasut, tamannalu unnerluutigineqartumut tutsinneqarsinnaanngilaq.

Taamatut eqqartuussisoqarfiup eqqartuussutaa allanngortinneqarpoq.

Unnerluutigineqartoq Pinerluttunik Isumaginnittoqarfiup aalajangersagai malillugit aningaasarsiaqartinneqarani inuiaqatigiinni sulisinneqassaaq nalunaaquttap akunneri 60-it qaammatini arfilinni sivisunerpaaffilikkamik. Unnerluutigineqartoq ukiuni marlunni Pinerluttunik Isumaginnittoqarfimmit nakkutigineqassaaq piffissallu taassuma iluani atuipilunnermut aamma tarnip pissusaatigut katsorsagaassaaq imaluunniit peqqissarneqarluni Pinerluttunik Isumaginnittoqarfiup aalajangersagai malillugit.

Sinnerini eqqartuussisoqarfiup eqqartuussutaa atuuttussanngortinneqarpoq.

Suliap normua: K 201/20

Eqqartuussissutit nassuiaatillu