Qaammatini pingasuni inissiisarfimmut inissinneqarnermut - K 139/20

Eqqartuussissut Nunatta Eqqartuussisuuneqarfianit oqaatigineqarpoq ulloq 26. november 2020.

Sermersuup Eqqartuussiviata eqqartuussutaani 9. decembari 2019-imeersumi unnerluutigineqartoq pisuutinneqarpoq unioqqutitsisimasutut pinerluttulerinermi inatsisip §-iisa 88-ianik aamma 113-ianik siulleq pingasoriarluni kingullerlu marloriarluni. Suliaq nunatta eqqartuussisuuneqarfiani pineqaatissiissutaasup naliliiffigeqqinneqarnissaatut suliarineqarpoq.

Eqqartuussisut marluk taasipput, pineqaatissiissut aalajangiunneqassasoq inissiisarfimmut inissinneqarnermik qaammatini pingasuni. Taakku taasisut pingaartutut isigaat nakuusernerup peqqarniissusia, niaqqumik isimmitsinerit aammalu tukkaanerit, aammalu unnerluutigineqartoq siusinnerusukkut pineqaatinneqarsimammat taamatut ittunut pinerluuteqarsimanernut. Inissiinissap sivisussusiata aalajangerniarnerani sakkukillisaatitut isigineqarpoq, inatsisinik unioqqutitsinerit piliarineqarsimammata 2016-imi aamma 2018-imi. Taamaakkaluartorli taakku kingunerisinnaanngilaat pineqaatissiissutip utaqqisitassanngortinneqarnissaanut imaluunniit inuiaqatigiinni sulisitaasussatut eqqartuussuteqarnermik.

Eqqartuussisoq ataaseq taasivoq, pineqaatissiissut – ingammik unnerluutigineqartup inuttut atugaanut tunngasunik paasissutissat eqqarsaatigalugit aammalu nalinginnaasuunngitsumik suliap taama sivisutigisumik suliarineqarneranut piffissaq atorneqartoq, tamatumunnga unnerluutigisaq akisussaatinneqarsinnaanngimmat – eqqartuussuteqartariaqartoq inuiaqatigiinni sulisitaanissamut. Siusinnerusukkullu pineqaatissinneqarsimanera inummut ulorianartumik pinerluuteqarnermut tunngasumik, aammalu suliami matumani nakuusernerit pingasut ataatsimut aalajangiiffigineqartussat, allaanerusumik inerniliiffigineqarsinnaanngillat. Eqqartuussisup taasisup uparuaatigaa, suliaq piffissani sivisoorsuarni uninngatinneqartarsimasoq, aammalu, naak inatsisinik unioqqutitsinerit tallimat pineqaraluartut, suliaq nalorninartortaqanngilaq.

Amerlanerit taasinerat malillugu eqqartuussuteqartoqartussaammat, unnerluutigineqartoq eqqartuunneqarpoq inissiisarfimmut inissinneqarnermik qaammatini pingasuni.

Unnerluussisussaatitaasut arnaq pineqartoq sinnerlugu piumasaqaatigaat taarsiissutissat annertussuseqartut 3000 koruuninik. Oqaatigineqarpoq aningaasat tassaasut atisanik, pas-imik, nammattakkamik il.il. annaasaqarnermut. Piumasaqaalli tamakkiisumik ilaannakortumilluunniit uppernarsaaserneqarsimanngimmat, unnerluutigineqartoq tassunga tunngasumik pinngitsuutinneqarpoq.

Eqqartuussiviup eqqartuussutaa allanngortinneqarpoq imatut, pineqaatissiissut aalajangerneqarmat inissiisarfimmut inissinneqarnermut qaammatini pingasuni.

Unnerluuutigineqartoq unnerluussisussaatitaasut piumasaqaataannit 3.000 koruuninik taarsiinissamut.

Tamatuma saniatigut eqqartuussiviup eqqartuussutaa atortussanngortinneqarpoq.

Suliap normua: K 139/20

Eqqartuussissutit nassuiaatillu