Pineqaatissiissut allanngortinnagu atortussaatinneqarpoq- K 128/20

Eqqartuussissut Nunatta Eqqartuussisuuneqarfianit oqaatigineqarpoq ulloq 19. november 2020.

Pinerluttulerinermi inatsit § 162, imm. 4 naapertorlugu, unnerluussisussaatitaasut isumagisassaraat piffissap sivisutiginissaa siumut aalajangereernagu eqqartuussissutip pisariaqanngitsumik atajuartinneqannginnissaa. 

Nakorsat ilisimasallit suliami ilisimatitsissutaat naapertorlugit toqqammavigineqassaaq, atajuartitsiinnarnissaq pisariaqanngitsoq tassa inuit allat inuunerannut ulorianartorsiortitsinissamu, timaannut imaluunniit kiffaanngissuseq pillugit pinaveersaartitsinissaq, tassa eqqartuussaq imigassamik aalakoornartortalimmik atornerluinngippat. Tamaalilluni Herstedvester Fængselimit oqaaseqaammit 7. februar 2020-meersumi ersersinneqarpoq, eqqartuussaq ingalassimanissap pisariaqassusaanut tunngatillugu paasinnissimasoq, tassa akuersaaraa, antabusinik katsorsarneqarnissani, aamma timimigut eqqarsartaatsimigullu nungullarsimasutut isikkoqarpoq sivisuumik paarnaarussaaqqanerata kinguneranit, aamma inissiisarfimmut ammasumut nuutsitsinermi atornerluinissaq annikitsuaraasoq nalilerneqarpoq. 

Aammattaaq ersersinneqarpoq, eqqartuussaq ullumikkut imigassamik aalakoornartortalimmik atornerluisuunngimmat, 2018-imili aanngajaarniutinik ikiaroornartunik atuijunnaarsimavoq, aamma qaratsamigut aanaartornermi kingorna inuttut allannguuteqarnerup kinguneranit hashimik perusussuseerussimammat. Aamma ersersinneqarpoq, Herstedvesteri katsorsaanissamut iliuusissanik allanik tikkuussisinnaanngimmat inissiisarfimmut ammasumut nuutsitsinissaq pitinnagu.

Tamanna tunngavigalugu naammaginanngitsutut isigineqarpoq, tassa annertunerusumik anisikkiaartuaarneqarnissaa pillugu aallartitsisoqarsimanngimmat soorlu inissiisarfimmut aammasumut nuutsitsinissamut tunngatillugu naak qulaaniittut pineqaraluartut tunngavigalugit. 

Tamanna taamaakkaluarpalluunniit, suliami ilisimatitsissutit pigineqartut tunngavigalugit qularnaatsumik naammattumik tunngavissaqanngilaq eqqartuunneqartup iperarneqarnissaanut, tamakkiisumik imaluunnit misiligummik, tamaattoqassappammi matoqqasumik inissiisarfimmiit toqqaannartumik anisoqartassammat aatsaat ingiallorteqarnikkut namminerisamik inigisamut sinaakkuteqanngitsumut pinissamut. Tassunga tunngatillugu oqaatigineqassaaq, eqqartuunneqartoq 1982-imili annerpaamik matoqqasumik inissiisarfimmiiginnavinnikuummat kiffaanngissuseqarnerlu killilerujussuunikuulluni. 

Nunatta eqqartuussisuuneqarfiata qulaaniittut tunngavigalugit piumasarivaa, piaarnerpaamik eqqartuussamut tunngatillugu, inummut ulorianaatilittut matoqqasumik inissiisarfiup katsorsartittartut avatangiiseralugit pinerluuteqarsinnaaneranut aarlerinassusaata nalilerneqarnissaa suliarineqassasoq, taamatuttaaq nalilerneqassaaq eqqartuussaq tassanngaannaq kiffaanngissuseqarneq sapinnsannginneraa tassa atornerluinermut utersaarnani inummut pinerluuteqaqqinnginnissaa pillugu. 

Suliamit pissutsit qanoq ittuuneri tunngavigalugit ataatsimut nalileereernerup kingorna eqqortuunerusutut isigineqarpoq, Kalaallit Nunaata Eqqartuussisuuneqarfiata eqqartuussutaa 26. juli 2001-imeersup allanngortinnagu atortussaatiinnarneqarnissaa, taamaalilluni anisikkiartuuartitsinissap ingerlanneqarnissaa aallartinneqarsinnaassammat, taamaalilluni eqqartuunneqartoq Pinerluttunik isumaginnittoqarfiup sinaakkutaasa avataatigut inuuneqarnissaminut piareersarsinnaassalluni. 

Tamanna tunngavigalugu eqqartuussiviup aalajangiinera misiligummik iperagaanissaq pillugu atorunnaarsinneqarpoq. 

Kalaallit Nunaanni Eqqartuussisuuneqarfiup ulloq 26. april 2001-imi pineqaatissiissutaa allanngortinnagu atortussaatiinnarneqarpoq. 

Suliap normua: K 128/20

Eqqartuussissutit nassuiaatillu