10 mar 2022
Nunatta Eqqartuussisuuneqarfia
Inuiaqatigiinni sulisitaanissamut eqqartuunneqarpoq - K 153/20
Angut 34-nik ukiulik Qaasuitsup eqqartuussiviani eqqartuunneqarpoq 100 tiimit inuiaqatigiinni sulisitaanissamut, arnamut sinittumut kinguassiutaatigut eqqaatigullu attuuaalaraamiuk. Arnap mitagaaneranut 40.000,00 koruuninik taasiisussanngortinneqarpoq.
Eqqartuussissut Nunatta Eqqartuussisuuneqarfianit oqaatigineqarpoq ulloq 12. november 2020.
Nunatta eqqartuussisuuneqarfiata eqqartuussiviup tunngavilersuutaa inerniliineralu isumaqatigivaat.
Nunatta eqqartuussisuuneqarfia eqqartuussivimmituulli isumaqarput, arnap pineqartup nassuiaataa uppernassuseqartoq, aamma unnerluutigineqartup arnap nassuiaataa naapertorlugu pisuutinneqassasoq unnerluussissut naapertorlugu. Arnaq nassuiaavoq, soriarsinnaanngitsumik pinngitsaaliilluni atoqateqarneq aatsaat nalunaarutigineqarsimasoq ukioq ataatsip missaa pisimasup pineraniit qaangiummat, aamma nunatta eqqartuussisuuneqarfia isumaqarpoq, taanna kingusissukkut nalunaarutiginninneq arnap suliami nassuiaataanut sakkukillisaataanngitsoq.
Eqqartuussisaaseq malillugu soriarsinnaanngitsumik pinngitsaaliilluni atoqateqarneq aallaaviatigut eqqartuussutaasarpoq piffissami sivisulaartumi pinngitsoorani pineqaatissinneqarsimasunut inissiisarfimmiittussanngortitsineq, pissutsillu naapertorlugit sakkortusaataavoq, pinngitsaaliilluni atoqateqarneq pisimammat angerlarsimaffimmi eqqissiviilliortitsinermut atatillugu.
Nunatta eqqartuussisuuneqarfiata eqqartuussivik isumaqatigivaa, pissutsit immikkut ittuuneri pissutigalugit matumani suliami inuaqatigiinni sullissinissamik eqqartuussuteqassasoq, eqqartuussivimmitulli aalajangerneqarsimasutut, kisianni piffissaq nakkutiginninnissamut sivitsorneratigut ukiumik ataatsimik qaammatillu arfinillit. Nunatta eqqartuussisuuneqarfiata ingammik pingaartippaat, pisimasoq piliaasimammat ukiut pingasut sinnerlugit matuma siornatigut, piffissarlu sivisooq atorneqarsimasoq unnerluutigineqartup pisuussutiginngimmagu, aamma pisimasup kingorna pinerluuteqaqqissimanngimmat, tassa matumani suliami pineqartoq pillugu.
Suliamut piffissaq sivisuumik atorneqarsimagaluarpalluunniit, utaqqisitamik pineqaatissinneqarsimasunut inissiisarfimmiittussanngortitsineq naammattutut isigineqanngilaq suliap peqqarniissusaa pissutigalugu.
Mitagaanermut taarsiissutissat aalajangerneqarput 30.000 koruuninut tassa mitagaanermut taarsiissutissat soriarsinnaanngitsunut allatut ittumik kinguaassiuutitigut atuinermut tunngatillugit, piliarineqartut april 2018 sioqqullugu.
Taanna allannguut nakkutiginninnissamut piffissaq ilanngullugu aamma mitagaasimanermut taarsiissutissat ilanngullugit eqqartuussiviup eqqartuussutaa atortussaatinneqarpoq.
Eqqartuussiviup eqqartuussutaa atortussaatinneqarpoq allannguutit ilanngullugit, tassa piffissaq nakkutiginnissamut tunngasoq sivitsorneqarpoq ukiumik ataatsimik qaammatinillu arfinilinnik aamma arnamut mitagaasimanermut taarsiissutissaq aalajangerneqarpoq 30.000 koruuninut.
Suliap normua: K 153/20
Eqqartuussissutit nassuiaatillu