23 sep 2020
Nunatta Eqqartuussisuuneqarfia
Pinngitsaaliilluni atoqateqarnermut eqqartuussut - K 050/19
Angut 18-nik ukiulik Eqqartuussisoqarfik Sermersuumi meeqqamik 15-it inorlugit ukiulimmik pinngitsaaliilluni atoqateqarsimasutut pisuutinneqarpoq.
Unnerluutigineqartup meeqqamik 15-it inorlugit ukiulimmik atoqateqarsimanini nassuerutigaa taamaattorli pinngitsaaliilluni atoqateqarsimanini pillugu pinngitsuunerarluni. Pinerlinneqartulli pisup ilumoorneranik nassuiaanera tunngavigalugu eqqartuussiviup uppernarsisippaa atoqatigiinneq piumassuserinngisaanik pisimasoq unnerluutigineqartorlu pinerluttulerinermi inatsimmi §77, imm. 1, nr. 2, tak. § 79-mik unioqqutitsisimasutut eqqartuunneqarpoq.
Unnerluutigineqartup ukiukinnera eqqarsaatigalugu kiisalu taassuma pinerlinneqartullu attaveqatigiinnertik ingerlatiinnarsimammassuk, eqqartuussiviup unnerluutigineqartoq isumaginnittoqarfimmit ukiunik marlunnik sivisunerpaaffilikkamik nakkutigineqarnissaa naleqquttuusoraa.
Unnerluussisussaatitaasut eqqartuussut eqqartuussisuuneqarfimmut suliareqqitassanngortippaat suliarlu tassannga suliareqqitassanngortitsinertut suliarineqarpoq.
Eqqartuussisuuneqarfiup inerniliinera
Eqqartuussisuuneqarfiup pinngitsaaliilluni atoqatigiittoqarsimanera uppernarsinngilaa unnerluutigineqartorlu pinerluttulerinermi inatsimmi § 79-mi meeqqamik atoqateqarsimanermut tunngasumik taamaallaat unioqqutitsisimasutut eqqartuuppaa. Unnerluutigineqartup ukiui pinerluuteqarsimasunillu isumaginnittoqarfiup oqaaseqaatai tunngavigalugit unnerluutigineqartoq akunnerni 40-ni inuiaqatigiinni sulisitaasussatut eqqartuussaavoq. Unnerluutigineqartoq ilanngullu mitagaanermut ajunngitsorsiassanik 10.000 kr.-nik akiliisussatut eqqartuunneqarpoq.
Ulloq aalajangiiffik
Eqqartuussut Nunatta Eqqartuussisuuneqarfianit oqaatigineqarpoq ulloq 29. august 2019
Suliap normua: K 050/19
Nunatta Eqqartuussisuuneqarfiata eqqartuussutaa