17 sep 2020
Nunatta Eqqartuussisuuneqarfia
Aqqusinikkut angallannermi inatsimmi unioqqutitsinermi - K 143/19
Angut 37-inik ukiulik Qaasuitsup Eqqartuussisoqarfianit eqqartuunneqarpoq imigassamik aalakoornartulimmik imersimalluni biileriaraluarnermi, tassa biili motorimik ingerlatilik ingerlassimagamiuk aani imigassamik aalakoornartulimmik minnerpaamik 1,99 promillemik akoqartoq.
Eqqartuussisunit uppernarsineqanngilaq unnerluutigineqartup biili motorimik ingerlatilik aqussimaneraa, taamaallaat aquttarfiani issiasimagami biili apussinermiit kaanngartinniarsaralugu. Taamaattumik taamaallaat pisuutinneqarpoq imigassartorsimalluni biileriaraluarnermut.
Tamatuma saniatigut unnerluutigineqartoq pisuutinneqarpoq biili pineqartoq ingerlassimallugu naak biilersinnanermut pisinnaatitsissummik peqanngikkaluarluni, kiisalu ATV nalunaarsorneqanngitsoq arlaleriarluni ingerlattarsimallugu, taamaalilluni politiit unitsitsinissamik peqqusinerat malittarsimanagu.
Taamatullu aamma unnerluutigineqartoq unnerluutigineqarpoq eqqartuussisarnermi inatsimmi § 125, imm. 3-mik unioqqutitsinermut, tassa inimi eqqartuussivimmi assiliisimanermut pisarialimmik akuersissummik peqarani, tamatumalu kingornatigut immiussaq facebookikkut ingerlaartissimallugu. Aaamma pisimasumi tamatumani eqqartuussivimmi pisuutinneqarpoq.
Unnerluutigineqartoq katillugit 10.000 kr.-inik akiligassinneqarluni eqqartuunneqarpoq. Piffissaq suliap suliarineqarnerani atorneqartoq isiginiarneqarluni taamaallaat unnerluutigineqartoq utaqqisitamik ukiumi ataatsimi ingerlatseqqusaajunnaarsinneqarpoq.
Nunatta Eqqartuussisuuneqarfiata inerniliinera
Nunatta eqqartuussisuuneqarfianut taamaallaat imigassamik aalakoornartulimmik imersimalluni biilersimaneq pinngitsuutinneqarnissamik piumasaqaatitaatitalik suliareqqitassanngortinneqarpoq. Nunatta eqqartuussisuuneqarfiata eqqartuussisoqarfik assigalugu tunngavigivaa, unnerluutigineqartoq biilip aquttarfiani issiasimammat ilani ikiorniarlugit, taakkua biili apummiit ajattarniarsarigaat, kisiannili tassa isumaqarlutik imigassamik aalakoornartulimmik imersimalluni biilernerusoq.
Naak suliap suliarineqarnerani piffissaq ukiut pingajuat affaagaluartoq, eqqartuussisuuneqarfik isumaqarpoq ingerlatsisinnaajunnaarsitsineq utaqqisitanngortinneqariaqanngitsoq, ingerlatsisinnaajunaajunnaarsitsinerlu aalajangersarneqarpoq ukiunut pingasunut. Akiligassiissut eqqartuussutaasoq appartinneqarpoq 5.000 kr.-inut. Sinnerini eqqartuussisoqarfiup eqqartuussutaa atuuttussanngortinneqarpoq.
Ulloq aalajangiiffik
Nunatta Eqqartuussisuuneqarfianit eqqartuussut nalunaarutigineqarpoq ulloq 28. august 2019
Suliap normua: K 143/19
Nunatta Eqqartuussisuuneqarfiata eqqartuussissutaa
Qaasuitsup eqqartuussiviata eqqartuussissutaa