Gå til sidens indhold

Nunatta Eqqartuussisuuneqarfia

29 apr 2021

Nunatta Eqqartuussisuuneqarfia

Pineqaatissiissut allanngortinneqarpoq - K196/18

Eqqartuussisuuneqarfiup Sermersuup Eqqartuussiviata aalajangiinera 23. oktobari 2018-imeersoq pjneqaatissiissummik atorunnaarsitsisoq allanngortippaa.

Eqqartuussisuuneqarfik aalajangerpoq pineqaatissiissut, Nunatta Eqqartuussisuuneqarfiata eqqartuussutaani 18. oktobari 1991-imeersumi eqqartuussutigineqartoq, atortuutiinnarneqassasoq. Eqqartuussummi eqqartuussaq toqutsisimasutut eqqartuunneqarpoq piffissami killiligaanngitsumi Danmarkimi tarnit nakorsaannit aqunneqartumut Pinerljuttunik Isumaginnittoqarfiup ataaniittumut inissiisarfimmut inissinneqassasoq.

Eqqartuussisuuneqarfiup aaliangernera

Eqqartuussisuuneqarfiup ilatigut pingaartutut isigaa, eqqartuussap pingajussaannik toqutsisimasutut eqqartuussut naammassiniarsarimmagu, aammalu nalunaarutit, suliamut atatillugu suliarineqarsimasut malillugit suli inuit allat inuunerinik, timaanik, peqqissusiinik nammineersinnaanerinilluunniit innarliinissamut ulorianaateqarmat. Tamatuma saniatigut Kalaallit Nunaanni allamik inissiisarfeqanngilaq Eqqartuussaasimasunut Inissiisarfik eqqaasanngikkaanni atugassarititaasunut killiliisinnaasut aammalu isumannaallisaanermik pisariaqartutut isigisariaqartunik neqeroorsinnaasut.

Ulloq aalajangiiffik

Nunatta Eqqartuussisuuneqarfianit eqqartuussut oqaatigineqarpoq ulloq 3. juni 2019.

Suliap normua: K 196/18

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa

Nassuiaat