Gå til sidens indhold

Nunatta Eqqartuussisuuneqarfia

17 dec 2020

Nunatta Eqqartuussisuuneqarfia

Toqutseriaraluarnermut pinngitsuutinneqartoq - K 227/18

Angut 57-inik ukiulik toqutseriaraluarnermut Eqqartuussisoqarfimmi Sermersuumi unnerluutigineqarpoq, taassumami pinerlineqartoq aalajangerlugu nunamut paagullugu sakiaasa qaavanut allaallugu issiavigisimavaa, kingornalu niaquatigut ujaqqamik 2,1 kg-tut oqimaatsigisumik ataasiarlugu anaasimallugu.

Toqutseriaraluartoqarsimanera eqqartuussisoqarfiup uppernarsarneqarsimasorinngilaa unnerluutigineqartorlu peqqarniitsumik nakuusernermut taamaallaat pissuutissimallugu. Eqqartuussisoqarfiup pineqaatissiissut qaammatini arfineq-pingasuni inissiisarfimmiittussanngortitsinermut aalajangersarsimavaa.

Unnerluussisussaatitaasut eqqartuussisuuneqarfimmut piumasaqaateqarput eqqartuussisoqarfimmut unnerluussissutaasimasoq malillugu eqqartuussuteqartoqassasoq aamma sukannernerulersitsisoqassasoq.

Eqqartuussisuuneqarfiup inerniliinera

Eqqartuussisoqarfiup uppernarsarneqarsoraa unnerluutigineqartup pinerlineqartoq niaquatigut ujaqqamik nakuuserfigisimagaa, suliarineqartariaqartunik ajoquserlugu. Eqqartuussisoqarfilli isumaqatigalugu eqqartuussisuuneqarfiup uppernarsarneqarsorinngilaa unnerluutigineqartoq nakuusernermini pinerlineqartumik toqutsinissaminik siunertaqarsimasoq. Pineqaatissiissummik aalajangersaanermi eqqartuussisuuneqarfiup pingaartippaa, unnerluutigineqartup inunnut navianaatilimmik siornatigut pineqaatissinneqartareersimanera, aamma pinerlineqartoq taannarpiaq nakuuserfigisimallugu. Tamanna tunngavigalugu eqqartuussisuuneqarfiup pineqaatissiissut ukiumi ataatsimi qaammatinilu pingasuni inissiisarfimmiittussanngortitsinermut aalajangersarpaa. 

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 8. februar 2019

Suliap normua: K 227/18

Nunatta Eqqartuussisuuneqarfiata eqqartuussissutaa

Sermersuup eqqartuussiviata eqqartuussissutaa

Nassuiaat