Gå til sidens indhold

Nunatta Eqqartuussisuuneqarfia

29 apr 2021

Nunatta Eqqartuussisuuneqarfia

Aserorterinermi, nakuusernermi aamma aalakoornartulimmik imigassartorsimalluni ingerlatsinermi - K166/19

Angut 25-inik ukiulik Eqqartuussisoqarfik Sermersuumit pisuutinneqarpoq aserorterinermut, nakuusernernut arlalinnut, tassunga ilaatinneqarluni peqqarniitsumik nakuuserneq, kiisali imigassamik aalakoornartulimmik imersimalluni ingerlatsineq. Eqqartuunneqarpoq qaammatini arfineq marlunni pineqaatissinneqarsimasunut inissiisarfimmiittussanngortinneqarluni, kiisalu ingerlatsisinnaatitaanermik arsaagaaneq ukiuni pingasuni

Nunatta eqqartuussisuuneqarfiata inerniliinera

Unnerluutigineqartoq nunatta eqqartuussisuuneqarfianit imigassamik aalakoornartulimmik imersimalluni ingerlatsisimanermut pinngitsuutinneqarpoq, uppernarsineqanngitsutut isigineqarmat ilumut unnerluutigineqartup piffissami taaneqartumi biili ingerlassimaneraa. Nunatta eqqartuussisuuneqarfia isumaqanngilaq paasissutissat unnerluutigineqartup promilliata qaffasinnera, aamma kølerhjelmip kissarnera eqqartuussutigissallugit naammattut imigassartorsimalluni ingerlatsisimanermut. Pisimasut sinnerini unnerluutigineqartoq pisuutinneqarpoq.

Nunatta eqqatuussisuuneqarfiata naapertuuttutut isigivaa pineqaatissiissutip aalajangersarneqarnera qaammatini arfinilinni pineqaatissinneqarsimasunut inissiisarfimmiittussanngornermik. Isiginiarneqarlutik paasissutissat, tassa unnerluutigineqartumut siusinnerusukkut eqqartuussutaasimasut, taamaattumillu eqqartuussut utaqqisitanngortinneqarsinnaanani.

Ulloq aalajangiiffik

Nunatta Eqqartuussisuuneqarfianit eqqartuussut nalunaarutigineqarpoq ulloq 19. december 2019-imi.

Suliap normua K 166/19

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa

Nassuiaatit