Gå til sidens indhold

Nunatta Eqqartuussisuuneqarfia

16 dec 2020

Nunatta Eqqartuussisuuneqarfia

Cannabisip naasuinik kr. 7.500-nik akiligassinneqarneq - K 177/19

Angut 20-nik ukiulik hashimik 85,5 gramimit annikinnerunngitsutut nalilerneqartumik, ingerlateqqinneqartussamik, pilersitsinissani siunertaralugu cannabisip naasuinik pingasunik cannabisillu naasuinik kipillugit ikkutanik naatitsisimasutut pigisaqarsimasutullu

Qaasuitsup Eqqartuussisoqarfianit pisuutinneqarpoq. Aamma tillinniarnermut pisuutinneqarpoq, igalaarmi aserorlugu illumut isertersimavoq. Unnerluutigineqartulli GoPro assiliivimmik illumiit tillissimanerarneqarnera Eqqartuussisoqarfiup uppernarsarneqarsimasorinngilaa, unnerluussissutillu taakkutsitartaanut pinngitsuutissimavaa.

Eqqartuussisoqarfiup pineqaatissiissut ulluni 30-ni inissiisarfimmiittussanngortitsinermut aalajangersarsimavaa, aamma naasuliviit naasutallit pingasut atortuilu arsaarinnissutigineqarsimapput. Unnerluutigineqartoq aamma suliamut aningaasartuutinik akiliisussanngortinneqarsimavoq. 

Unnerluutigineqartup eqqartuussut taanna eqqartuussisuuneqarfimmut suliareqqitassanngortippaa, pinngitsuutitsinissaq piumasaqaatigalugu.

Eqqartuussisuuneqarfiup inerniliinera

Eqqartuussisuuneqarfiup uppernarsarneqarsimasorinngilaa naasunik naatitsinermi ingerlatitseqqiinissaq siunertarineqarsimasoq, taamaattumillu unnerluutigineqartoq naasunik pingasunik, hashimik nammineq atugassaminik naatitsinissaq siunertaralugu naatinneqarsimasunik, pigisaqarsimanermut pisuutinneqarpoq. Unnerluutigineqartup naatitsiviata inuuniutaasussatut isikkoqannginnera eqqarsaatigalugu eqqartuussisuuneqarfik isumaqarpoq, naatsorsueriaatsimik, Eqqartuussiviit Qullersaata eqqartuussutaani 5. oktober 2016-imeersumi atorneqartumik, atuinnginnissaq tunngavissaqartoq, tamatumalu kingorna taamaallaat uppernarsarneqarsoraa unnerluutigineqartoq hashimik 85 gramimit annikinnerusumik taamaallaat pissarsinissaminik siunertaqarsimasoq. Unnerluutigineqartup tillinnermut pinngitsuutinneqarsimanera eqqartuussisuuneqarfimmit isumaqataaffigineqarpoq, taamaattumillu iliuuserisimasassat pinerluttulerinermi inatsisip § 102-aniittut piviusunngortinneqarsimasorineqanngillat. Pisimasorli pinerluttulerinermi inatsisip § 96-ianut aamma § 113-ianut tunngatinneqalerpoq, unnerluutigineqartormi igalaamik aseruilluni illumut isersimavoq.

Eqqartuussisuuneqarfiup pineqaatissiissut kr. 7.500-nik akiligassiininngortillugu appartippaa, suliamullu aningaasartuutit naalagaaffiup karsianut akiligassanngortippai.

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 16. oktober 2019

Suliap normua: K 177/19

Nunatta Eqqartuussisuuneqarfiata eqqartuussissutaa

Qaasuitsup eqqartuussiviata eqqartuussissutaa

Nassuiaat