Gå til sidens indhold

Nunatta Eqqartuussisuuneqarfia

04 dec 2020

Nunatta Eqqartuussisuuneqarfia

Qaammatinut pingasunut allanngortinneqartoq

Angut 26-nik ukiulik qerisunik tilleriarnermut, kr. 85.000 missaannik aningaasivissuarmiit tillinnermut pisiniarfimmilu sulisumik spillekuponip aningaasartaanik tunniunneqareernikunik tunniussititsinermigut peqquserlunnermut Qeqqata Eqqartuussisoqarfianit pisuusutut isigineqarsimavoq.

Taanna 26-nik ukiulik ataasiarluni peqquserloqataanermut pinngitsuutinneqarpoq.

Taanna eqqartuussisoqarfimmit eqqartuunneqarsimavoq qaammatini arfinilinni inissiisarfimmiittussanngortinneqarluni kiisalu taarsiissutinik akiliisussanngortinneqarluni.

Eqqartuussisoqarfiup eqqartuussutaa taanna unnerluutigineqartumit suliareqqitassanngortinneqarpoq. Unnerluussisussaatitaasunit piumasaqaatigineqarpoq eqqartuussisoqarfiup eqqartuussutaa taanna qaammatini pingasuni inissiisarfimmiittussanngortitsinermut allanngortinneqassasoq.

Nunatta Eqqartuussisuuneqarfiata inerniliinera

Nunatta Eqqartuussisuuneqarfiata eqqartuussut qaammatini pingasuni inissiisarfimmiittussanngortitsinermut allanngortippaa tamatumalu saniatigut eqqartuussut atuuttussanngortippaa.

Nunatta Eqqartuussisuuneqarfiata sakkortusaataasumik pingaartippaa qerisunik tillinnerup qanoq ittuunera ingamillu aningaasivissuarmiit tillinneq, ilaatigut piliarineqarsimalluni allat marluk peqatigalugit ullullu arlallit sioqqullugit pilersaarusiorneqarsimalluni, tassani unnerluutigineqartoq allatut isumataarnissaminut piffissaqarluarsimalluni.

Eqqartuussisut sakkukillisaataasumik pingaartippaat unnerluutigineqartup siornatigut pineqaatissinneqarnikuunnginnera aamma qerisunik tillinnermut 2015-imi septembarimi pisimasumut tunngatillugu piffissaq suliap suliarineqarneranut atorneqarsimasoq.

Ulloq aalajangiiffiusoq

Eqqartuussut Nunatta Eqqartuussisuuneqarfianit nalunaarutigineqarpoq ulloq 20. juli 2018.

Suliap normua: K 064/18

Nunatta Eqqartuussisuuneqarfiata eqqartuussissutaa

Qeqqata eqqartuussiviata eqqartuussissutaa

Nassuiaat