Kalaallit Nunaanni Eqqartuussiviit

Eqqartuussisooqataasartuunissamik eqqarsaateqaruit – taava ataaniittoq atuaruk.

Eqqartuussisooqataasartutut eqqartuussivimmi suliani pinerluttulerinermi suliani aalajangeeqataasassaatit, kisianni annikinnerusumik saqitsaannermi sulianut aamma aggersarneqartarsinnaassaatit.

Eqqartuussisooqataasartut immikkut eqqartuussinermi sulianut imaluunniit inatsisinut ilisimaqartariaqanngillat. Eqqartuussisooqataasartut suliassaraat nalinginnaasumik innuttaasut paasinninnerattut suliat eqqartuussutigineqarnissaannut tapersiissallutik.

Nalinginnaasumik pinerlunnermik suliat siullermeersumik aalajangiivigineqarneranni eqqartuussisoq eqqartuusseqataasartullu marluk peqataasarput. Pinerlunnermik suliani amerlanerit taasineratigut aalajangiisoqartarpoq.

Pinerluttulerinermi suliami eqqartuussisooqataaguit, pineqartullu pisuutinnera aalajangerlugu, taava pineqartup inatsimmik unioqqutitsineranut pineqaatissiissutigineqartussaq aalajangeeqataaffigissavat. Suliaq taanna pingaaruteqartorujussuuvoq – suliamut ataasiakkaamut unnerluutigineqartumullu.

Kina eqqartuussisooqataasartunngorsinnaava?

Innuttat nalinginnaalluinnartuupput eqqartuussisooqataasartuunissamik suliakkerneqartartut. Taamaattorli aalajangersimasunik piumasaqaateqarpoq, eqqartuussisooqataasartunngorniaruit naammassisinnaasassannik.

Pingaarnertullu eqqartuussisartooqataasinnaanngilatit, Inatsisartuni ilaasortaaguit, politiini atorfeqaruit, pineqaatissinneqarsimasunut isumaginnittoqarfimmi, imaluunniit eqqartuussissusilerisuuguit.

Tamatuma saniatigut piumasaqaataavoq:

Kalaallit Nunaanni najugaqarnissat
18-inik ukioqalereersimanissat
Piffissami eqqartuussisooqataanermi 70-inik ukioqalertussaannginnissat
Tusaamanerlugaassanngitsutit, ima naliginnaasumik paasineqassalluni, pinerluttulerinermi suliami eqqartuunneqarsumasuussanngitsutit.

Soqutiginnippit?

Kalaallit Nunaata Eqqartuussiviani imaluunniit eqqartuussisoqarfimmi eqqartuussisooqataasartussatut piukkunneqarsinnaavutit qinnuteqarnermi immersugassaatitta, nipangiussisussaatitaanermik pisussaaffik, pinerluuteqarsimasullu nalunaarsorneqarfiannut paasissutissanik ilinnut tunngasunik eqqartuussiviup piniarsinnaaneranut akuersissutip atsiorneratigut, taamaalilluni eqqartuussivik pinerluuteqarsimasunik nalunaarsorneqartarfiannut paasissutissanik ilinnut tunngasunik piniarsinnaanngortillugu. Qinnuteqarnissamut paasissutissanillu piniartoqarsinnaaneranut akuersinissamut immersugassat uani nassaarisinnaavatit tooruk:

Eqqartuussisoqarfimmi Kalaallit Nunaanni Eqqartuussivimmiluunniit eqqartuussisooqataasartoorusukkuit, Kalaallit Nunaanni Eqqartuussivimmut saaffiginninnissannut info.rig@domstol.gl-imut saaffiginninnissannut tikilluaqqusaavutit.

Qinnuteqaat kingusinnerpaamik tingoreersimassuarput ulloq 10. november 2025.

Nunatta Eqqartuussisuuneqarfiani eqqartuussisooqataasartoorusukkuit, eqqartuussisuuneqarfimmut post@landsret.gl-mut saaffiginninnissannut tikilluaqqusaavutit.

Eqqartuussinissaq sioqqullugu piareersartoqassava?

Eqqartuussisooqataasartutut aalajangiinernik eqqortunik aalajangeeqataasarnissannut, pingaartorujuuvoq eqqartuussivimmut siullermeerlutit takkutsinnak, ilitsersuussutip ilinnut nassiunneqartup sukumiisumik atuarnissaa.

Ilitsersuut uani atuaruk (pdf)

Suliani sorlerni eqqartuussisooqataasartunit peqataaffigineqartarpat?

Pinerluttulerinermi suliani ilungersunartuni eqqartuussisooqataasartut peqataasarput, unnerluussisussaatitaasut unnerluutigineqartup akiliisitsinermiit sukanganerusumik pineqaatissinneqarnissaa kissaatigingaangassuk. Eqqartuussisuttaaq aalajangersinnaapput, suliami immikkut unnerluutigineqartumut akuliuffiginniffiusuni aalajangiinissani eqqartuussisooqataasartut peqataanissaannik.

Sooq eqqartuussiviit eqqartuussisooqataasartunik atuisarpa?

Eqqartuussisooqataasartut peqataassapput inuiaqatigiit kalaallit ataatsimut naapertuuttutut isigisaat aallaavigalugu, eqqartuussivimmi suliani aalajangiinerit pisaqqullugit. Eqqartuussisooqataasartut naliginnaasumik inuiaqatigiit kalaallit akornanni isummertarnermut sinnersaassapput.

Pisuuneq aalajangiinerlu isummerfigineqassappat?

Eqqartuussisup eqqartuussisooqataasartut inatsisit pineqaatissiisarnermilu periusiusut naliginnaasut pillugit ilitsersussavai. Eqqartuussisooqataasartut eqqartuussisup ilitsersuutai nalunngeqatiginnissutertillu tunuliaqutaralugit aalajangernertik aalajangertassavaat.

Suliaq aalajangiiviginerani, eqqartuussisooqataasartut eqqartuussisorlu tamarmik ataatsimik taasissutissaqarput – unnerluutigineqartup pisuuneranut apeqqummut tunngatillugu, aamma pineqaatissiissutaasinnaasup suunissaanik aalajangiinissamut apeqqummut tunngatillugu, assersuutigalugu pineqaatissinneqarsimasunut inissiisarfimmiittussanngortitsinermik. Eqqartuussisooqataasut marluk unnerluutigineqartup pinngitsuutinneqarnissaanik taasisut, eqqartuussisoq pisuutitsinissamik taasisoq, eqqartuussut pinngitsuutitsinerussaaq.

Qanoq eqqartuusseqataasartunngortarpat?

Eqqartuussisooqataasartut ukiut sisamakkaarlugit innersuussutigineqartarput.

Kalaallit Nunaanni Eqqartuussiviani eqqartuussisoq pisortap, inuit pineqartut eqqartuussivinni suliarinneqqaarfiusuni, eqqartuussisoqarfinni eqqartuussisooqataasartussatut atuussinnaasutut piukkunnartutut isigisaat innersuussutigisarpai. Eqqartuussisoqarfiit eqqartuussisooqataasartui kommunalbestyrelsinit toqqarneqartarput.

Kalaallit Nunaanni Eqqartuussivimmi eqqartuussisooqataasartut Kalaallit Nunaanni Eqqartuussivimmi eqqartuussisup pisortap innersuussutigisarpai.

Eqqartuussisuuneqarfimmi eqqartuussisooqataasartut eqqartuussisuunermit innersuussutigineqartarput.

Kalaallit Nunaanni Eqqartuussivimmi eqqartuussisuuneqarfimmilu eqqartuussisooqataasartut Inatsisartunit toqqarneqartarput.

Eqqartuussisooqataasartutut ima akissarsiaqartinneqartassaatit

Eqqartuussisooqataasartutut akissarsiassanik akunnernut sisamanut sivisussusilimmut imaluunniit ullormut akissarsititsisoqartarpoq, maanna kr. 700,00-iusut aammalu kr. 1.100,00-iusut tak. § 1 nalunaarummi nr. 1369 16. december 2009-meersumi.

Arfininngornikkut imaluunniit sapaammi nalliuttorsiorfinnilu eqqartuussisoqarnikkut Eqqartuussisooqataasartutut akissarsiat maanna kr. 1.050,00-iusut aammalu kr. 1.650,00-iusut tak. § 1, imm. 2, nalunaarummi nr. 1369 16. december 2009-meersumi.

Eqqartuussisooqataasartut najukkamik avataanni eqqartuussinerni peqataasut (suliaqarlutik angalaqataasut) eqqartuussinernut peqataanerni, qanorluunniit sivisutigigaluartuni, ulloq naallugu akissarsiassaqartinneqartuaannarput, ullunilu angalaffiusuni aamma taamatut tak. § 1, imm. 3, nalunaarummi nr. 1369 16. december 2009-meersumi.

Angalatilluni kinguaattoornerni eqqartuussisooqataasartut piffissami aallarfissamiit pilersaarutigineqartumiit angerlarfiup tungaanut ullormut akissarsiaqartinneqartarput.

Eqqartuussisooqataasartunut akissarsiaritinneqartartut ataani takussutissiami ersipput.

Ullup affaa	Kr. 700,00
Ulloq tamaat	Kr. 1.100,00
Weekendimi/nalliuttorsiorfinni ullup affaa	Kr. 1.050,00
Weekendimi/ nalliuttorsiorfinni ulloq tamaat	Kr. 1.650,00

Eqqartuussisooqataasartoq ullormut eqqartuussinernut arlalinnut peqataasinnaavoq.

Assersuutigalungu eqqartuussinerit marluk ima inissisimappata:

Ullaakkut nal. 9 – 13 akornanni maanna kr. 700,00-iusut eqqartuussisooqataasartumut akissarsiaritinneqassapput.
Ualikkut nal. 13 – 17 akornanni maanna kr. 1.100,00 -iusut eqqartuussisooqataasartumut akissarsiaritinneqassapput.
Eqqartuussinerit marluk imaluunniit amerlanerit ullaakkut ualikkullu ikkunneqarsimappata qanorluunniit sivisutigigaluit ulloq tamakkersimasutut akissarsissutigineqassapput kr. 1.100,00-iusut.

Eqqartuussisooqataasartoq ullormut ataasiaannarluni akissarsitinneqarsinnaavoq.

Paasissutissat kingulliit: 20. oktobarip 2025

Kalaallit Nunaanni Eqqartuussiviit