14 mar 2022
Nunatta Eqqartuussisuuneqarfia
Ukiuni 3-ni inissiisarfimmiittussanngortinneqarluni - K 004/2020
Angut 32-nik ukiulik Sermersuup Eqqartuussiviani pisuutinneqarpoq hashimik 15 kiilo missaani Danmarkimiit nunatsinnut eqqusseqataasimanerminut.
Eqqartuussissut Nunatta Eqqartuussisuuneqarfianit oqaatigineqarpoq ulloq 16. september 2020.
Eqqartuussisuuneqarfiup pineqaatissiissummik aalajangersaanermini pingaartippaa Nuummi Aasiannilu hashimik tuniniaanermi ingerlaavartumi aaqqissuulluakkamilu peqataaneq pineqartoq aamma unnerluutigineqartoq taamaaliornermi siuttutut ataqatigiissaarisutullu inissisimaffeqarsimasoq. Eqqartuussisuuneqarfiup uppernarsarneqarsorinngilaa unnerluutigineqartoq bagmandivittut atuuffeqarsimasoq, tunngaviutinneqarporli taassuma atuuffia pingaaruteqanngitsutut oqaatigineqarsinnaanngitsoq. Haship, unnerluutigineqartup anngiortumik eqqusseqataanermut tuniniaanermullu pisuutinneqarfia, annertussusaa piffissamilu sivisuumi ingerlaavartumik hashimik tuniniaasoqarsimanera eqqartuussisuuneqarfiup pingaartippattaaq. Pineqaatissiissummik aalajangersaanermi ilanngullugu tunngaviutinneqarpoq unnerluutigineqartoq ikiaroornartut pillugit inatsisinik unioqqutitsinermut siornatigut eqqartuussaanikuusoq.
Qulaaniittut kingunerisaannik eqqartuussisuuneqarfiup pineqaatissiissut ukiuni pingasuni inissiisarfimmiittussanngortitsinermut aalajangersarneqassasoraa, taamaattumillu eqqartuussisoqarfiup eqqartuussutaa tamatumunnga naapertuuttumik allanngortinneqarpoq.
Unnerluutigineqartoq 31 gram hashimik tigumiaqarnermut pinngitsuutinneqarmat eqqartuussisoqarfiup arsaarinnissuteqarnissamik aalajangiisimanera tamatumunnga naapertuuttumik allanngortinneqarpoq.
Eqqartuussisoqarfiup suliamut aningaasartuutit pillugit aalajangiisimanera eqqartuussisuuneqarfiup isumaqataaffigaa. Suliap suliareqqitassanngortinneqartup inernera eqqarsaatigalugu eqqartuussisuuneqarfimmut suliamut aningaasartuutit naalagaaffiup karsianit akilerneqassapput
Unnerluutigineqartoq eqqartuunneqarpoq ukiuni pingasuni inissiisarfimmiittussanngortinneqarluni.
Eqqartuussisoqarfiup arsaarinnissuteqarnissaq pillugu aalajangiinera atuuttussanngortinneqarpoq, imaalilluguli 31 gram hashimik arsaarinnissuteqarnissamut pinngitsuutitsisoqarluni.
Suliap normua: K 004/20
Eqqartuussissutit nassuiaatillu