Qaammatini 6-ni pineq. inissiisarfimmiittussanngortinneqarluni - K 130/20

Eqqartuussissut Nunatta Eqqartuussisuuneqarfianit oqaatigineqarpoq ulloq 18. december 2020.

Pisimasoq 1

Unnerluussisussaatitaasunit piumasaqaatigineqarpoq pinngitsuutitsisoqarnissaanik, tamannalu unnerluutigineqartup isumaqatigivaa. Taamaattumik suliami pisimasoq 1-mi pinngitsuutinneqassalluni.

Pisimasoq 3

Unnerluutigineqartoq pisuunnginnerarpoq nassuiaallunilu, nammineq annilaangagisimallugu saassunneqarnissanik pinerlineqartumik saassussisoq unitsinniaraluaruniuk, aatsaallu naggataatigut iluatissimavaa saassussisoq unitsillugu. Taamatullu aamma nassuiaavoq saassussinerup kingornatigut fiisteriarsimallutik, tamatumalu kingornatigut tamarmik angerlarsimallutik kisiannili politiinut sianersinnaasimanani imaluunniit ambulancenut, oqarasuaatimini tusasseqannginnami.

Uppernarsaasiisoqareerneratigut eqqartuussisuuneqarfimmit tunngavigineqarpoq, saassussineq sivisungaatsiarsimasoq, unnerluutigineqartullu paasinninnera malillugu, saassussisup pinerlineqartoq toqussinnaagaa. Taamatullu aamma tunngavigineqarpoq unnerluutigineqartup ilisimaarisimagaa, piffissami tamatumani pinerlineqartoq qimakkamikkut pinasuartumik ikiortariaqartoq, tassami nunami nalavoq aalassariassanani aamma qannguisutut nipiliorluni.

Naak unnerluutigineqartup saassussinerup nalaani annilaanngatigisimagaluarpaguluunniit aamma nammineq nakuuserfigineqarnissani, eqqartuussisuuneqarfik isumaqarpoq kingusinnerusukkut unnuup/unnuap ingerlanerani periarfissaqarluarsimagaluartoq qanoq iliuuseqarnissaminut pinerlineqartup ikiorneqarnissaanut, aamma tamanna pisimasinnaagaluartoq annerusumik imminut ulorianartorsiortinngikkaluarluni imaluunniit imminut pilliutiginngikkaluarluni.

Qulaani oqaatigineqartut tunngavigalugit nunatta eqqartuussisuuneqarfia isumaqarpoq eqqartuussisoqarfittuulli uppernarsineqartoq, unnerluutigineqartup pisarialimmik iliuuseqarnernissaminik aalajangiinngitsoornermigut pisuusoq inuup inuuneranik isumakkiiginnaanermigut, tak. Pinerluutulerinermi inatsimmi § 89, tassa pinerlineqartoq saassussinerup kingunerisaanik toqukkut qimagummat.

Pissutsillu imaannerat, tassa ersarissarneqanngimmat qanorpiaq nassaarfimmi unnuap tamatuma nillertigisimanera, tassami qutsissutsikkut assigiinngitsorujussuummata silasiorfiup Tasiilaq Hotelip tunuaniittup aamma naasuliarfimmi, tassani toqunneqartup nassaarineqarfiani, tamanna allatut inerniliissutaasinnaanngilaq. Tassunga atatillugu oqaatigineqassaaq, DMI-p paasissutissiinera tunngavigalugu, taava ilimanaateqanngilaq nassaarfiup kiannerungaarnissaa.

Pisimasoq 5

Eqqartuussisoqarfiup tunngavilersuutitut oqaatigisai nunatta eqqartuussisuuneqarfiata isumaqatigivai, unnerluutigineqartoq pisuusoq immiaaqqanik karsinik marlunnik tillissimasutut.

Pineqaatissiissut

Eqqartuussisoqarfiup tunngavilersuutitut oqaatigisai nunatta eqqartuussisuuneqarfiata pineqaatissiinermi isumaqatigivai, taamaalilluni unnerluutigineqartoq eqqartuunneqarluni qaammatini arfinilinni pineqaatissinneqarsimasunut inissiisarfimmiittussanngortinneqarluni.

Qulaani oqaatigineqartut tunngavigalugit suliareqqitassanngortitartaani eqqartuussisoqarfiup eqqartuussutaa atuuttussanngortinneqarpoq. 

Suliap normua: K 130/20

Eqqartuussissutit nassuiaatillu