Gå til sidens indhold

Nunatta Eqqartuussisuuneqarfia

24 feb 2023

Nunatta Eqqartuussisuuneqarfia

Ulluni 60-ni pineq. inissiisarfimmiittussanngortinneqarnermik - K 028/23

Angut 45-nik ukiulik eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni, taanna inunnut arlalinnut nakuusersimammat aammalu siorasaarilluni.

Eqqartuussissut Nunatta Eqqartuussisuuneqarfianit oqaatigineqarpoq ulloq 24. februar 2023.

Unnerluutigineqartoq eqqartuussisoqarfimmi ulloq 15. august 2017 eqqartuunneqarpoq arnamik niaqummiinermut. Aamma ullormi 28. oktober 2018 eqqartuunnearpoq arnamik niaquatigut seeqqummiisimanermut, ulloq 24. februar 2019 taaneqartoq arnaq kingulleq kiinaatigut timaatigullu annersarsimallugu aamma ulloq 23. august 2020 arnaq taaneqartoq kingulleq siniffiup aamma iikkap akornanut kiggutitissimallugu, tassanilu niaquatigut arlaleriarlugu tukkarsimallugu. Pisuunermik apeqqut nunatta eqqartuussisuuneqarfianut suliareqqitassanngortinneqanngilaq.

Unnerluutigineqartoq eqqartuunneqarpoq peqqarniitsumik nakuusernernut pisimasunut sisamanut, aallavittullu pineqaatissiissutitaqartartumik piffissami sivisunerusumi pineqaatissinneqarsimasnut inissiisarfimmiittussanngortinneqarnissamik.

Suliami pisimasoq siulleq piliarineqarsimavoq unnerluutigineqartup kingullermik eqqartuunneqarnera sioqqullugu, isumaqarnarlunilu 2018-mi eqqartuunneqarami pisimasoq taanna ilanngunneqarsimagaluarpat utaqqisitaanngitsumik pineqaatissinneqarsimasunut inissiisarfimmiittussanngortinneqarsimassagaluartoq.

Taamatullu aamma nunatta eqqartuussisuuneqarfiata sakkortusaatitut isigalugu pingaartippaat, pisimasut aappaat 2018-mi nakuusernermut eqqartuussaanermi kinguninnguatigut piliarisimammagu

Suliami 2018-meersumi eqqartuussummi ersersinneqarpoq eqqartuussisoqarfiup eqqartuussutaani,  arlaleriarluni pingaarnertut isumaqatigiinniarnissamut ulluliinerigalugit kinguartinneqartarsimasut unnerluutigineqartumut aggersaanerit nalunaarutigineqarnissaat iluatsittarsimanngimmat. Aamma suliaq sivitsorsarneqarsimavoq ilassutitut unnerluussissutit arlallit suliarineqarsimaneri pissutigalugit. Tamanna tunngvigalugu nunatta eqqartuussisuuneqarfia isumaqarpoq, piffissaq suliap suliarineqarneranut atorneqarsimasoq ilaatigut unnerluutigineqartup pisuussutigigaa.

Taamaattumik, aamma pinerluttunik isumaginnittoqarfik innersuussuteqarsinnaanngimmat inuiaqatigiinni sulisitaanissamik, unnerluutigineqartoq suleqatigisinnaasimannginnamikku, aammalu isiginiarneqarluni piffissap suliap suliarineqarneranut atorneqartumut tamakkiisumik unnerluutigineqartoq pisuutitaasinnaanngimmat, tassunga ilanngullugu piffissaq suliareqqitassanngortitsinermi ingerlasimasoq, nunatta eqqartuussisuuneqarfiata pineqaatissiissut aalajangersarpaa ulluni 60-ni pineqaatissinneqarsimasunut inissiisarfimmiittussanngortinneqarnermik.

Unnerluutigineqartoq eqqartuunneqarpoq ulluni 60-ni pineqaatissinneqarsimasunut inissiisarfimmiittussanngortinneqarnermik.

 

Suliap normua: K 028/23

Eqqartuussissutit nassuiaatillu