15 sep 2022
Nunatta Eqqartuussisuuneqarfia
Qaammatini 3-ni pineq. inissiisarfimmiittussanngortinneqarluni - K 148/22
Dom afsagt: 15. septembarip 2022
Angut 31-nik ukiulik Qeqqata Eqqartuussiavianit pinngitsuutinneqarpoq, arnaq imigassartorsimanini sininninilu pissutigalugit pisumut akiuuteriarsinnaasimanngitsup, atoqatigigamiuk imaluunniit kinguaassiuutaatigut allatut atoqatigalugu. Unnerluutigineqartoq pisuunnginnerarpoq.
Eqqartuussissut Nunatta Eqqartuussisuuneqarfianit oqaatigineqarpoq ulloq 15. september 2021.
Arnaq pineqartoq nassuiaavoq aalakoortorujussuusimalluni, itersimavoq piumanani unnerluutigineqartup atoqatigigaani, aatsaallu atoqatigiunnaarsimagaani marloriarlugu uneqqusinermini timini illikartiitigalugu.
Arnap nassuiaataa ilisimannittup angutip nassuiaaneranit ikorfartuiffigineqarpoq, tassa perusuersartarfimmut anillassimammat nammineq tassaniilluni, oqaluttuarsimavorlu atornerlunneqarsimalluni, kiisalu ilisimannittup arnap nassuiaataanit, tassa unnerluutigineqartup arnaq pineqartoq inissiamiit anisoq utoqqatserfigisimagaa.
Taamatullu aamma tunngavigineqarpoq unnerluutigineqartup arnamut messenger-ikkut nassuitsisimanera, arnamut utoqqatserluni. Nunatta eqqartuussisuuneqarfiata unnerluutigineqartup nassiussat imaannik arnap nassuiaaneranut akerliissuteqanngilaq allammat ” uannut nuanninngilaq artuleqqasunga taamaaliorneqarlunga”, illuatunganiilli iliuuserisaminut utoqqatserluni allakkami ” Aamma taamak eqqaarsanngilanga”.
Oqaatigineqassaaq unnerluutigineqartup pingaarnertut isumaqatigiinniarnermi eqqartuussisoqarfimmi aamma nunatta eqqartuussisuuneqarsiani nassuiaateqarumasimanngimmat.
Taamaalilluni nunatta eqqartuussisuuneqarfianit uppernarsineqarpoq unnerluutigineqartoq pisuusoq unioqqutitsinermut pinerluttulerinermik inatsimmi § 77, imm. 1, nr. 2-mik, unnerluussissummi oqaatigineqartutut, arnaq aalakoornini pissutigalugu atoqatigiinnermut akiuuteriarsinnaanngimmat.
DNA-mik misissuinerup inernera allatut inerniliissutaasinnaanngilaq, uppernarsaataasinnaasutut isumaqarfigineqanngimmat atoqatigiinnerup pisimannginneranut.
Eqqartuussisarnermi periusiuvoq suliani soriarsinnaanngitsumik pinngitsaaliinermi eqqartuussisarneq aallaavittut piffissami sivisunerusumi utaqqisitaanngitsumik pineqaatissinneqarsimasunut inissiisarfimmiittussanngortitsinermik.
Ataatsimut nalilersuereernermi unioqqutitsinerup pissusianut aamma peqqarniissusianut aamma isiginiarneqarluni piffissaq suliap suliarineqarneranut atorneqartup unnerluutigineqartup pisuussutiginngimmagu, pineqaatissiissut aalajangersarneqarpoq qaammatini pingasuni pineqaatissinneqarsimasunut inissiisarfimmiittussanngortinneqarnermik, tak. Pinerluttulerinermik inatsimmi § 146, tak. § 77, imm. 1, nr. 2.
Eqqartuussisarnermi periusiusartoq malillugu mitagaanermut ajunngitsorsiassaq aalajangersarneqarpoq 40.000 kr.-inut.
Unnerluutigineqartoq, eqqartuunneqarpoq qaammatini pingasuni pineqaatissinneqarsimasunut inissiisarfimmiittussanngortinneqarluni.
Unnerluutigineqartup akilissavai 40.000 kr.-it arnamut pineqartumut.
Suliap normua: K 148/22
Eqqartuussissutit nassuiaatillu