Mianersoqqussummik nalunaarfigineqarpoq - K 284/21

Eqqartuussissut Nunatta Eqqartuussisuuneqarfianit oqaatigineqarpoq ulloq 7. Marts 2022.

Unnerluutigineqartoq eqqartuussisoqarfiup eqqartuussutaatigut ulloq 6. juni 2017 eqqartuunneqarpoq oqaasiinnartigut arnamut pineqartumut inuuneranik siorasaarisimanermut. Taamatullu aamma eqqartuunneqarpoq qanilleqqusinnginnermik unioqqutitsinermut 15. september 2017-mi, arnaq mail-inik marlunnik nassisimagamiuk ulluni 4. aamma 5. juni 2018. Pisimasuni taakkunani pisuunermik apeqqutit nunatta eqqartuussisuuneqarfianut suliareqqitassanngortinneqanngillat.

Nunatta eqqartuussisuuneqarfia isumaqarpoq, unnerluutigineqartup nassuiaataa, ilimagalugu arnaq pisiniaqatigisimallugu ulloq 15. september 2017-mi qanilleqqusaannginneq nalunaarutigineqareersoq, tamanna qularnaateqarpallaartoq qanilleqqusinnginnerup atorunnaarsimasutut isigineqarnissaanut.

Taamaalillunu nunatta eqqartuussisuuneqarfiata eqqartuussisoqarfiup tunngavilersuutaa aamma pisuunermik apeqqummik naliliinera isumaqatigivaa suliami pisimasut pingajuanni aamma sisamaanni, taamaattumik eqqartuussisoqarfiup pisuunermik apeqqummik aalajangiinera atuuttussanngortinneqarpoq.

Utaqqisitamik pineqaatissinneqarsimasunut inissiisarfimmiittussanngortitsinissaq aallaavittut pineqaatissiissutissatut suliami matumani pineqartumi naapertuuttuuvoq.

Kisiannili suliap naapertuutinngitsumik sivisoorujussuarmik suliarineqarsimavoq piffissani sivisuuni uninngaannartarsimalluni unnerluussutip eqqartuussivimmut tunniunneqarneraniit juli 2018-mi eqqartuussisoqarfiup eqqartuussummik oqaatiginninnissaanut februar 2021-mi. Kingornatigullu suliaq sivisuumik uninngatinneqarsimalluni nunatta eqqartuussisuuneqarfianut tunniunneqarnissami ulloq 29. november 2021-ip tungaanut.

Suliami paasissutissat naapertorlugit tunngavigineqartariaqarpoq, suliami piffissaq atorneqarsimasoq unnerluutigineqartup pisuussutiginngikkaa, aamma 2018-ip aasaanili nutaamik pinerluuteqaqqissimanngilaq.

Pissutsit taamaannerisigut nunatta eqqartuussisuuneqarfia aalajangiivoq suliami matumani pineqaatissiissut aalajangersaaffigineqassasoq mianersoqqusinermik.

Unnerluutigineqartoq mianersoqqussummik nalunaarfigineqarpoq.

Suliap normua: K 284/21

Eqqartuussissutit nassuiaatillu