Eqqartuussisoqarfiup eqqartuussutaa atuuttussanngortinneqarpoq - K 006/22

Eqqartuussissut Nunatta Eqqartuussisuuneqarfianit oqaatigineqarpoq ulloq 3. Marts 2022.

Nakorsanit oqaaseqaatit arnap pineqartup inissisimaneranut tunngatillugu sanilliunneqarluni arnaq najugaqarfimmi Sungiusarfik Ikinngummi najugaqartuunera, taanna tassaavoq inuusuttunut inersimasunullu timikkut aamma tarnikkut ineriartornermikkut innarluutillit ulloq unnuarlu angerlarsimaffiat, nunatta eqqartuussisuuneqarfia isumaqarpoq arnaq pinerluttulerinermi inatsimmi § 78, imm. 1-imi inunnut taaneqartunut ilaasoq.

Unnerluutigineqartoq pedelitut atorfeqarnermini najugaqarfimmi Sungiusarfik Ikinngut, aamma nassuiaatigineqartut naapertorlugit tunngavigineqartarpoq, unnerluutigineqartup arnaq ilisimasaqarfigilersimagaa najugaqatigiiffimmi sulinerminut atatillugu. Taamaattumik ilisimasaqarfigalugu arnap qanoq inissisimanera.

Nunatta eqqartuussisuuneqarfianit arnap nassuiaataa uppernartutut isumaqarfigineqarpoq, oqaaseqarneri nammineq misigisimasaasutut nipaqarmata. Taamatullu aamma apeqqutigineqartunut nangaassuteqarani toqqaannartumik akissuteqartarluni. Arnap nassuiaataa tunngavigalugu, tassa unnerluutigineqartup arlaleriarluni aperisimagaani atoqatigerusunneraani, tamatigullu noqqaassutaa itigartittarsimaga, nunatta eqqartuussisuuneqarfiata uppernarsineqartut isumaqarfigivaa, unnerluutigineqartup arnaq atoqatigeriaraluarsimagaa ineriartornermigut innarluuteqarnera atornerlullugu, unnerluussissummi oqaatigineqartutut.

Taamatullu aamma arnap nassuiaanera naapertorlugu eqqartuussisuuneqarfiup aamma uppernarsivaa, unnerluutigineqartup ataasiarlugu kunissimagaa, aamma usuni tissaqqasoq assilillugu nassiussimagaa, aammalu kimigiiserfigalugu iluatsissimagaa nassitsisillugu assinik iviangiminik aamma kinguaassiutiminik tamataqanngitsunik, unnerluussissummi oqaatigineqartutut.

Suliap peqqarniittsuunera, tassunga ilanngullugu unnerluutigineqartup najugaqatigiiffimmi Siungiusarfik Ikinngut atorfeqarnini atornerlussimammagu arnaq atoqatiginiarsarisimallugu, taanna ineriartornermi innarluutiliuvoq meeqqatullu ittuulluni, eqqartuussisuuneqarfik isumaqarpoq pineqaatissiissut ullunik 60-ni eqqartuussisoqarfimmit aalajangersarneqarsimasoq naapertuuttumik aalajangersarneqarsimasoq. Taamaalilluni aamma ilanngunneqarpoq isummerfigineqarlunilu suliap naapertuutinngitsumik sivisuallaamik suliarineqarsimanera.

Isiginiarneqarluni, unnerluutigineqartoq siusinnerusukkut assingusumik pinerluuteqarnermut eqqartuussaareersimanera aamma 2019-imiillu angerlarsimaffimmi suliffiusumi atorfineqqissimannginnera, sanilliullugu eqqartuussaareernermini suliami matumani ukiuni tulliuttuni suli ajornarnerulissammat taamatut atorfinitsinneqarnissaq, eqqartuussisut tunngavissaqanngilaat pisinnaatitaaffiiarneqarnissaa qinnuteqarnissamut najugaqatigiiffimmik suliffimmik atorfinitsitaasinnaanerani.

Kanngunarsaanerup pissusia naapertorlugu mitagaanermut ajunngitsorsiassat 10.000 kr.-inut aalajangersarneqarput. Tassani immikkut pingaartinneqarluni unnerluutigineqartup arnaq assiminik nassitsisissimammagu.

Suliap normua: K 006/22

Eqqartuussissutit nassuiaatillu