Nakuuserneq - K 098/21

Eqqartuussissut Nunatta Eqqartuussisuuneqarfianit oqaatigineqarpoq ulloq 6. maj 2021. 

Niviarsiaqqap videokkut apersorneqarnerata tunuartinneqarnissaanut apeqqut aamma nunatta eqqartuussisuuneqarfiani qaqinneqarpoq. Nunatta eqqartuussisuuneqarfia eqqartuussisoqarfittuulli isumaqarpoq, tassa tunngavissaqanngitsoq isumaqarnissamut, niviarsiaqqap videokkut apersorneqarneranut atatillugu suliap suliarineqarnerani kukkusoqarsimaneranik, taamaalillunilu videokkut apersuineq suliami uppernarsaatitut atorneqarsinnaanani. Ilaatigut nunatta eqqartuussisuuneqarfianit pingaartinneqarpoq niviarsiaqqap paasissutissiissutaa, tassa niviarsiaqqap suliamut apersorneqarmat anaanaata unnerluutigineqartoq aapparisimanngikkaa, suliarlu politiinut anaanaasoq nalunaarutigineqarsimalluni niviarsiaqqap apersorneqarnissaa sioqqutilaarlugu, suliami ersersinneqarluni, anaanasoq videokkut apersuinissamik ilisimatinneqarsimasoq.

Niviarsiaqqap aamma unnerluutigineqartup nassuaareernerisigut nunatta eqqartuussisuuneqarfiata tunngavigivaa, unnerluutigineqartup niviarsiaraq illikartinniarsimagaa, nammineq anaanasoq aaqqiagiinngissuteqarfigigamiuk, taamaammallu unnerluutigineqartup niviarsiaraq tunuatigut ajassimallugu.  Ajatsinnerminut atatillugu niviarsiaraq nikorsinnaajunnaarluni kamippannut ilisivimmut ingippoq. Pissutsit allaaserineqartut tunngavigalugit nunatta eqqartuussisuuneqarfia isumaqarpoq, ajatsineq isigineqartariaqartoq unioqqutitsinertut pinerluttulerinermi inatsimmi § 88, uniffik siulleq, nakuuserneq pillugu.

Taamatullu aamma nunatta eqqartuussisuuneqarfia isumaqarpoq, pissutsit oqaluttuarineqartut tunngavigalugit tunngavigineqartariaqartoq, unnerluutigineqartup ilimanaatilerujussuarmik nalusimassanngikka niviarsiaqqap nakuusernermi pisumi torsuusaaqqami tamarmik sumiiffimminni taputartuunneqarsinnaasoq, taamaalillunilu ilimanaatilimmik nakuusernissamik siunertaqarsimanera. Taamaalilluni eqqartuussisoqarfiup eqqartuussutaa suliami pisimasoq 2-mi pisuunermik apeqqut atuuttussanngortinneqarpoq.

Aamma nunatta eqqartuussisuuneqarfiani naammattumik qularnarunnaarsitsisumik uppernarsineqanngilaq anaanaasup suliami pisimasoq 3-mi tillunneqarsimanera, taamaalilluni eqqartuussisoqarfiup eqqartuussutaa suliami pisimasoq 3-mi pisuunermik apeqqut atuuttussanngortinneqarpoq.

Nunatta eqqartuussisuuneqarfia isumaqarpoq, aallaavittut utaqqisitaanngitsumik pineqaatissinneqarsimasunut inissiisarfimmiittussanngortinneqarnermik suliami taamatut pissusilimmi eqqartuussisoqartariaqartoq. Aamma isumatigiissutigineqarpoq sakkortusaataasoq ullormi 9. februar 2020-mi pisimasumi nakuusertoqarnerani meeraq akuutinneqarsimammat.

Pingaartumik isiginiarneqarlutik unnerluutigineqartup inuttut atugai eqqartuussisooqataasut marluk isumaqarput pineqaatissiineq aalajangersarneqassasoq nalunaaquttap akunnerini 50-ni inuiaqatigiinni sulisitaanermik, tamannalu naammassineqassasoq sivisunerpaaffiliussap qaammatit arfinillit iluanni, aamma unnerluutigineqartoq Pinerluttunik Isumaginnittoqarfimmit nakkutigisassanngortinneqassasoq ukiumi ataatsimi, tak. pinerluttulerinermi inatsimmi § 88, uniffik siulleq, tak. § 141.

Eqqartuussisooqataasoq ataaseq isumaqarpoq, isiginiarlugu unnerluutigineqartup meeqqamut nakuusersimanera, eqqartuussisoqarfiup eqqartuussutaa atuuttussanngortinneqassasoq.

Amerlanerussuteqartut isumaat atorlugu eqqartuussut oqaatigineqarpoq.

Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, unnerluutigineqartoq eqqartuunneqarpoq nalunaaquttap akunneri 50-it inuiaqatigiinni sulisitassanngortinneqarluni, tamannalu naammassineqassalluni sivisunerpaaffiliussap qaammatit arfinillit iluanni. Taamatullu aamma unnerluutigineqartoq Pinerluttunik Isumaginnittoqarfimmit nakkutigisassanngortinneqarluni ukiumi ataatsimi.

Suliap normua: K 098/21

Eqqartuussissutit nassuiaatillu