Nakuuserneq toqutsinerlu - K 006/21

Eqqartuussissut Nunatta Eqqartuussisuuneqarfianit oqaatigineqarpoq ulloq 16 februar 2021:

Unnerluutigineqartoq ulloq 17. december 2019-imi nakuusernermut angummik niaquatigut isimmitsisimasutut, angutillu qinngamigut aallunilu pullattulerneranik malitseqartumut eqqartuussisoqarfimmi pisuutinneqarpoq.

Pisuutinneqarportaaq ullormi tassani kingusinnerusukkut -angummik aamma arnamik toqutsisimasutut. Angummik toqutsineq pivoq, toqusoq 39-inik ikinnerunngitsunik saviit assigiinngitsut atorlugit ilaatigut tunuatigut kapoorneratigut, aamma peqqarniitsumik toqusup niaqua nakuuserfigineratigut, taamaalilluni niaquata saarnginik sequmittoqartillugu. Arnamik toqutsineq pivoq, unnerluussap 70-init ikinnerunngitsunik savinnik assigiinngitsunik ilaatigut niaquatigut, sakiaatigut, tunuatigut taliatigullu kapoorneratigut. Unnerluutigineqartup ilaannakortumik qungasia siillugu kiisalu peqqarniitsumik ilaatigut niaquanut nakuuserfigineratigut.

Pissunermut apeqqut eqqartuussisuuneqarfimmut suliareqqitassanngortinneqanngilaq.

Pineqaatissiissutip aalajangersarnerani eqqartuussisuunerit isumaqarput, pingaartumik pingaartinneqassasoq, pineqarmata toqutsinerit naakkitsaalluinnartut, eqqugaasut ingasattumik nakuuserfigineqarlutik qaasseeriarlutillu kapoorneqarlutik. Toqutsisup nassuiaanera suliamilu saqqummertut allat naapertorlugit, tunngavigineqartariaqarpoq, toqutsinerit eqqarsaqqaarani pisimaneri, eqqugaasullu sussuteqannginneri.

Retspsykiatriimit nalunaarusiamit ilaatigut erserpoq, unnerluutigineqartoq immikkooruteqartoq, pissutsimi tungaatigut inerinneqanngitsoq, annikitsuinnarmik inuit allat eqqarsaataannut misigissusaannullu soqutiginnillunilu paasinninnissaminut piginnaanilik. Nalunaarusiamit erserportaaq, retspykiaterimut ajornakusoorsimasoq pisuni ajortuni nammineq eqqarsaatiminik, misigissutsiminillu eqqarsaatigitinnitsinnissaa. Aammattaaq Retspsykiatriimit nalunaarusiamit erserpoq, unnerluutigineqartoq naatsorsuutigineqartoq inuit allat inuunerinut, peqqissusaannut imaluunniit atugarissaarnerinut ima navianaateqartigisoq, pinerluttulerinermi inatsimmi § 161-ip atorneqarnissaa isumaliutigineqartariaqarluni.

Nakorsat eqqartuussinermi siunersiorneqartartut oqaatigaat, tunngavissaqarsinnaasoq ilimagissallugu, unnerluutigineqartiq immaqa allaat qanittunnguusoq annertuumik inunnut allanut inuunerinut, peqqinnerinut imaluunniit kiffaanngissusaannut navianaateqartumik iliorsinnaanera, pingaartumik imigassamik aalakoornartulimmik sunnertisimanerup nalaani, aamma paarisassanngortinneqarnerup atorneqarnissaa piumasaqaataasinnaasoq navianaat tamanna pinaveersaartinniarlugu.

Nakorsat eqqartuussinermi siunersiorneqartartut qularnaattumik oqanngikkaluartut, unnerluutigineqartup annertuumik inuit allat inuunerinut, peqqinnerinut imaluunniit kiffaanngissusaannut navianaateqartumik iliorsinnaanera qanittunnguusoq, eqqartuussisuunerit isumaqarput, ataatsimullu suliamut paasissutissiissutigineqartunik naliliinerup kingorna ilimagineqartariaqarpoq, taamannak navianaateqartoq. Eqqartuussisuunermik pingaartumik nakorsat unnerluutigineqartup qanoq ittuussutsimigut immikkooruteqarnera pillugu paasissutissiissutigisaat pingaartippat, nakuusernerlu pissutissaqanngivissumik inunnut sussuteqanngitsunut pisimammat, toqutsinerit naakkitsaalluinnartumik pisimaneri, taakku ataatsimoortillugit, pisimasut pisimammata unnerluutigineqartup eqqartuussisoqarfimmi aappakorminut nakuusersimanini pillugu eqqartuunneqaqqamminerani.

Eqqartuussisuunerit isumaqarput, allaanerusumik pineqaatissiisoqarsinnaanngitsoq, naammaginartumik isumannaatsuutitsisumik, aamma taamaatumik paarisassanngortitsinissap atorneqarnissaa navianaatip taassuma pinngitsoortinnissaanut pisariaqartutut isigineqartariaqartoq.

Tamatuma kingorna, eqqartuussisoqarfiullu eqqartuussutaa ataatsimut pineqaatissiissutitut paasisariaqarmat, pisimasunik taakkunannga eqqartuussisoqarfiup eqqartuussutaani, Nunatta Eqqartuussisuuneqarfiata eqqartuussutikkut 14. januar 2020-meersukkut atuuttussanngortitaanik imaqartutut.

Eqqartuussisoqarfiup eqqartuussutaa atuuttussanngortinneqarpoq.

Suliap normua: K 006/21

Eqqartuussissutit nassuiaanerillu