Ulluni 60-ini inissiisarfimmiittussanngortinneqarput - K 232/19

Eqqartuussissut Nunatta Eqqartuussisuuneqarfianit oqaatigineqarpoq ulloq 12. juni 2020.

Ilisimannittup nassuiaaneratigut, ilisimannittup allap nassuiaataanit ilaatigut taperserneqartumik, uppernarsarneqarsorineqarpoq unnerluutigineqartut marluk kiisalu ilisimannittoq tamarmiullutik pisoqarmat pinerlineqartup qanittuaniissimasut.

Nassuiaatigineqartut tunngavigalugit eqqartuussisuuneqarfiup tunngaviutippaa unnerluutigineqartup pinerlineqartup taliatigut tigusimagaa, tamatumalu kingorna pinerlineqartoq nunamiilersimasoq minnerpaamillu quleriarluni isimmissarneqarlunilu tukkarneqarsimasoq. Nakuusersimaneq pillugu paasissutissat napparsimmaveqarfiup politiinut uppernarsaasiissutaanit aamma taperserneqarput, tassanngami ersersinneqarpoq pinerlineqartoq kiinnamigut, pukusummigut talimigullu saamerlikkut naakuuserfigineqarnermi kingunerisaanik tilluusaqarsimasoq aamma nuluni saamerleq annerisimagaa.

Uppernarsaasiissuteqarnerup kingorna uppernarsarneqarsorineqanngilaq unnerluutigineqartoq alla piffissami pineqartumi piffimmiissimasoq, tamannalu tunngavigalugu taanna pinngitsuutinneqassaaq. Eqqartuussisuuneqarfiup naliliineranut tunngavimmut ilanngunneqarpoq ilisimannittut arlaannaataluunniit taanna pisoqarfiusumiittutut oqaatiginikuunngikkaa.

Ilisimannittoq arnaq nassuiaavoq, unnerluutigineqartut pingajuat nakuusernermi peqataasimanngitsoq, tamannalu pinerlineqartumit namminermit taperserneqarpoq. Eqqartuussisuuneqarfiup matuma kingorna tunngaviutippaa nakuuserneq taamaallaat unnerluutigineqartunit marluusunik piliarineqarsimasoq.

Naak pinerlineqartoq kimit isimmissartissimalluni tukkartissimallunilu takunngikkaluaraa, kiinnanimi assamminik taliminillu assersoramiuk, unnerluutigineqartut marluullutik pinerlineqartumik minnerpaamik qulinik amerlassusilinnik isimmissaanermut tukkaanermullu pisuutinneqarput.

Unnerluutigineqartut pinerlineqartumut tilluaasimanermut pinngitsuutinneqarput, taassumami patittaasoqarnera nammineerluni eqqaamasaqarfiginngilaa.

Suliamik paasissutissiineq aallaavigalugu taamaaliornissaq pillugu isumaqatigeereernerup kingorna nakuuserneq pisimasorineqarpoq aamma unnerluutigineqartut unnerluussut malillugu qulaanitut annertussusilimmik pisuutinneqarput.

Pineqaatissiissut ulluni 60-ini inissiisarfimmiittussanngortitsinermut aalajangersarneqarpoq, ajoqusernerilli annikinnerannik paasissutissat eqqarsaatigalugit kiisalu unnerluutigineqartut inuttut atugaat eqqarsaatigalugit eqqartuussut utaqqisitanngortinneqarpoq, ukiuni marlunni nakkutigisaanermik ilaneqarluni. Nakuusernerup arlaliulluni isumaqatigeereerlunilu piliarineqarsimanera tunngavigalugu allatut inerniliisoqarsinnaanngilaq.

Inuttut atukkat pillugit paasissutissanut atatillugu oqaatigineqarpoq unnerluutigineqartup aappaata 2014-imi eqqartuussaasimanera oqaqqaarani atuinermut, eqqissiviilliortitsinermut allagartaqaranilu biilernermut tunngasuusoq, 2010-mi aggustusimi puujaasamik miloriarnikkut nakuuseriaraluarnerup saniatigut.

Unnerluutigineqartut eqqartuunneqarput ulluni 60-ini inissiisarfimmiittussanngortinneqarlutik, ukiuni marlunni misiligaaffiliinikkut utaqqisitanngortinneqartumik.  

Tamatuma saniatigut eqqartuussisoqarfiup eqqartuussutaa atuuttussanngortinneqarpoq.

Sulipa normua: K 232/19

Eqqartuussissutit nassuiaatillu