Gå til sidens indhold

Nunatta Eqqartuussisuuneqarfia

12 okt 2020

Nunatta Eqqartuussisuuneqarfia

Meeqqamik 15-it inorlugit ukiulimmik atoqateqarsimaneq - K 069/20

Angut 25-nik ukiulik Eqqartuussisoqarfik Qaasuitsumit pinerluttulerinermi inatsimmi § 79-mik unioqqutitsisimasutut pisuutinneqarpoq, matumani niviarsiaqqamik 15-it inorlugit ukiulimmik pingasoriarluni atoqateqarsimammat.

Eqqartuussiviup tunngavilersuutigaa atoqatigiinnerit nammineq piumassutsimik pisimanerat unnerluutigineqartorlu isumaqarsimammat niviarsiaraq 15-it sinnerlugit ukioqartoq, peqqutigalugu imigassamik sassaallerfiusumi fiistertillutik naapissimagamiuk. Eqqartuussiviup unnerluutigineqartoq utaqqisitamik ulluni 30-ni pineqaatissinneqarsimasunut inissiisarfimmiittussanngorlugu eqqartuuppaa.

Unnerluutigineqartup eqqartuussut eqqartuussisuuneqarfimmut suliareqqitassanngortippaa pinngitsuutinneqarnissani piumasaqaatigalugu.

Eqqartuussisuuneqarfiup inerniliinera

Eqqartuussisuuneqarfiup uppernarsinngilaa unnerluutigineqartup atoqatigiinnerit sioqqullugit niviarsiaqqap ukiuinik ilisimaqarsimannginnera tunngavilersuutigalugulu illuatungeriit atoqatigeeqqissimannginnerat unnerluutigineqartup niviarsiaqqap ukiuinik ilisimannilersimanerata kingorna. Eqqartuussisuuneqarfilli isumaqarpoq unnerluutigineqartoq niviarsiaqqap ukiui eqqarsaatigalugit mianersuaalliorsimasoq.

Eqqartuussisuuneqarfiup eqqartuussisuisa marluk nalilersuinermi unnerluutigineqartup inuttut atugai pitsaasut isiginiarpaat mianersoqqussummillu taamaallaat tunineqarnissaa nalilerlugu, tak. pinerluttulerinermi inatsimmi § 125. Eqqartuussisut taakku matumani ilaatigut tunngavilersuutigaat, atoqatigiinnerit niviarsiaqqap 15-liinissaanut qaammatit 1-2 sioqqullugit pisimammata.

Eqqartuussisut pingajuata eqqortuunerusoraa unnerluutigineqartoq ulluni 30-ni utaqqisitamik pineqaatissinneqarsimasunut inissiisarfimmiittussanngorlugu pineqaatissinneqarpat taamaalillunilu eqqartuussiviup eqqartuussutaata atuuttussanngortinneqarnissaa innersuussutigalugu.  

Amerlanerussuteqartut naapertorlugit eqqartuussisoqarmat unnerluutigineqartoq mianersoqqussummik tunineqarpoq.

Unnerluutigineqartoq niviarsiaqqamut mitagaanermut ajunngitsorsiassanik akiliinissamut pinngitsuutinneqarpoq, eqqartuussisuuneqarfiup suliap tamakkiisumik nalilerneqareernerata kingorna nalilermagu, mitagaaneq pisimanngitsoq niviarsiaqqap mitagaanermut ajunngitsorsiassanik pissarsinissaanik kinguneqartussatut. 

Ulloq aalajangiiffiusoq

Eqqartuussut Nunatta Eqqartuussisuuneqarfianit oqaatigineqarpoq ulloq 20. maj 2020.

Suliap normua: K 069/20

Eqqartuussissutit nassuiaatillu