15-it inorlugit ukiul. kinguaassiuutaatigut atoqatiginninneq - K 081/20

Eqqartuussissut Nunatta Eqqartuussisuuneqarfianit oqaatigineqarpoq ulloq 22. maj 2020.

Unnerluutigineqartoq Qaasuitsup Eqqartuussisoqarfiata eqqartuussutaatigut eqqartuunneqarpoq ulloq 17. juni 2019 utaqqisitamik qaammatini pingasuni pineqaatissinneqarsimasunut inissiisarfimmiittussanngortinneqarluni pinerluttulerinermi inatsimmi § 79-mik, kiisalu marloriarluni pinerluttulerinermi inatsimmi § 102-mik unioqqutitsisimanermut. Taamatullu aamma unnerluutigineqartoq niviarsiaqqanut atoqatigisimasaminut immikkut tamaasa mitagaanerinut 5.000 kr.-inik akiliisussanngortinneqarluni.

Suliaq nunatta eqqartuussisuuneqarfianit sivisussusiliilluni suliareqqitassanngortitatut suliarineqarpoq, taamaattumik nunatta eqqartuussisuuneqarfianit taamaallaat isummerfigineqartussaalluni pineqaatissiissutissamik aalajangersaanissaq.

Pisimasoq 1-mi aamma 2-mi pinerliinerup nalaani unnerluutigineqartoq 16-inik ukioqaleqqammerpoq pinerlineqartut 13-inik ukioqarlutik. Taamanikkut piffissami tamatumani unnerluutigineqartup pinerlineqartoq pisimasoq 2-mi pineqartoq aapparisimavaa. Aallaavittut suliani ukiukitsunik kinguaassiutitigut atoqatiginninnerni pineqaatissiissut aalajangersarneqarpoq pineqaatissinneqarsimasunut inissiisarfimmiittussanngortitsinermik, ukiumikkut taasarialimmik nikisimanngippata, imaluunniit aappariittut pissullit pineqarpata.

Isiginiarneqarluni piffissaq suliap suliarineqarneranut atorneqarsimasoq, tamannalu unnerluutigineqartup pisuussutiginngilaa, kiisalu paasissutissat, tassa atoqatigiinnerup nalaani unnerluutigineqartup niviarsiaqqap aappaa aapparisimagaa, eqqartuussisuuneqarfik isumaqarpoq suliaq qaqutiguuissumik mianersoqqusinermik aalajangiiffigineqarsinnaasoq, tak. pinerluttulerinermi inatsimmi § 125. Taamaattumik nunatta eqaartuussisuuneqarfianit isumaqarfigineqarpoq, piffissaq suliap suliarneqarneranut ataatsimut isigalugu atorneqarsimasoq ukiut sisamat ukiullu affaanik sivisussusilik kinguaassiutitigut pinerlunnermut naammassiuminaatsuunngitsumut naleqquttumiit annerusumik qaangiinniffiusimasoq, taamaattumillu unnerluutigineqartumut taarsiullugu taamatut aalajangerneqartariaqartoq. Taamatullu aamma nunatta eqqartuussisuuneqarfianit naliliinermi tunngavigineqarportaaq unnerluutigineqartoq piffissami pinerliiviusumi taamaallaat 16-inik ukioqarsimanera.

Innersuussutigineqarluni unnerluutigineqartup niviarsiaqqap aappaanut atoqatiginninnerani piffissami aappariissimammata, piumasaqaatigineqartumut mitagaaneranut akileeqqusissummut pinngitsuutinneqarpoq.

Eqqartuussisoqarfiup niviarsiaqqap mitagaaneranut akiliisussaatitaaneranik aalajangigaa atuuttussanngortinneqarpoq. Tamatumani pingaartinneqarpoq, suliami paasissutissiissutit naapertorlugit niviarsiaqqap kissaatigisimanngilaa atoqatigiinnissaq.

Eqqartuussisoqarfiup eqqartuussutaa imatut allanngortinneqarpoq, unnerluutigineqartoq  mianersoqquneqarpoq.

Unnerluutigineqartoq pinngitsuutinneqarpoq piumasaqaatigineqartumut niviarsiaqqap aappaanut mitagaaneranut akiliinissamut.

Sinnerini eqqartuussisoqarfiup eqqartuussutaa atuuttussanngortinneqarpoq.

Suliap normua: K 081/20

Eqqartuussissutit nassuiaatillu