15 dec 2020
Nunatta Eqqartuussisuuneqarfia
1000 literimik uuliakoortitsinermut 7.500-nik akiligassiineq - K 068/20
Ajoqusiisoq Aasianni kiassaateqarfimmi uuliamik immiinerminut atatillugu uuliamik 1.000 literimit annikinnerunngitsumik uuliakoortitsisimasutut Qaasuitsup Eqqartuussisoqarfianit eqqartuunneqarluni kr. 7.500-nik akiligassinneqarpoq.
Eqqartuussisoqarfiup naliliinermini ilaatigut pingaartippaa, ajoqusiisup nalusimanngikkaa kiassaateqarfiup pumpia aseqqukuusoq, taamaakkaluartorli uulialersuinermi nakkutigiuarneqarsimanngitsoq. Suliamik suliaqarnerup sivisuujunera eqqarsaatigalugu akiligassiissut appartinneqarpoq. Ajoqusiisoq suliamut aningaasartuutinik akiliisussanngortinneqarpoq.
Eqqartuussisuuneqarfiup inerniliinera
Eqqartuussisoqarfiup uppernarsaatinik inerniliisimanera eqqartuussisuuneqarfiup isumaqatigaa, eqqartuussisuuneqarfiummi tunngaviutippaa pisoqarsimanera eqqartuussisoqarfiup eqqartuussutaani aalajangersarneqartutut ittoq. Eqqartuussisuuneqarfiulli uppernarsarneqarsorinngilaa uuliakoorneq kuunnguanut, tasernut immamulluunniit kuussimasoq, taamaattumillu ajoqusiisoq unnerluussutip taakkutsitartaanut pinngitsuutinneqarpoq. Uuliakoortitsinerli nunamik mingutsitsivoq, uuliami toqqaannartumik nunamut kuussimavoq. Ajoqusiisup uliakoornerup ilaanik katersuiniaraluarsimanera allatut inerniliinermik kinguneqarsinnaanngilaq. Akiligassiissutip annertussusilerneqarnerani uuliakoornerup annertussusaa kiisalu ajoqusiisup uulialersuinermini mianersuaalliorsimanera eqqartuussisuuneqarfiup pingaartippai, akiligassiissullu kr. 10.000-inut qaffappaa.
Ajoqusiisoq suliamut aningaasartuutinik aamma eqqartuussisoqarfimmut akiliisussanngortinneqarpoq.
Ulloq aalajangiiffiusoq
Eqqartuussut Nunatta Eqqartuussisuuneqarfianit oqaatigineqarpoq ulloq 25. maj 2020.
Suliap normua: K 068/20
Eqqartuussissutit nassuiaatillu