21 mar 2022
Nunatta Eqqartuussisuuneqarfia
Inissiisarfimmiinnissaq ukiumik ataatsimik qaammatinillu 9-nik - K 167/20
Angut 25-nik ukiulik Sermersuup eqqartuussivianit eqqartuunneqarpoq arfineq-marloriarluni niviarsiaqqamik siullerpaamik aqqaneq marlunnik ukiulik atoqatigisarsimagamiuk. Pisut nalaanni 13-nik ukioqalersimavoq.
Eqqartuussissut Nunatta Eqqartuussisuuneqarfianit oqaatigineqarpoq ulloq 23. oktober 2020.
Unnerluutigineqartoq eqqartuussisoqarfimmit pisuutinneqarpoq niviarsiaraq atoqatigisimallugu arfineq marloriarlugu piffissami 23. oktober 2017-imiit 10. april 2018-ip tungaanut, taanna 13-inik ukioqartoq namminerlu 22-inik ukioqarluni. Taamatullu aamma eqqartuunneqarpoq niviarsiaraq alla pingasoriarlugu atoqatigisimallugu piffissami 13-ianiit 21-iani april 2018-imi, taanna 14-inik ukioqartoq.
Eqqartuussisoqarfik nunatta eqqartuussisuuneqarfianit isumaqatigineqarpoq, unnerluutigineqartup unnerluussissummi pisimasut pingajuanni oqaatigineqartutut pinngitsaaliisimasoq. Eqqartuussisuuneqarfiup pingaartumik pingaartippaa niviarsiaqqap uppernartumik aamma aalajangiusimasaminik nassuiaataa, tamanna ikorfartuiffigineqarpoq DNA-mik misissukkanit aamma nakorsamit paasissutissanit, tassa talimigut anniarisaqarsimasoq aappillersimallunilu.
Pineqaatissiissut aalajangersarneqarpoq ukiumi ataatsimi qaammatinilu qulingiluani pineqaatissinneqarsimasunut inissiisarfimmiittussanngortitsinermik. Suliami matumani pineqarput pisimasuni immikkut pineqaatissiineq, tak. pinerluttulerinermi inatsimmi § 138, uniffiit aappaat.
Pineqaatissiissutissamik aalajangersaanermi nunatta eqqartuussisuuneqarfiata ilaatigut pingaartippaa suliani imminnut ilisarisimareerlutik pinngitsaaliinermi eqqartuussinermi periuseq. Taamatullu aamma pingaartinneqarpoq pisimasoq 2-mi niviarsiaraq 15-inik ukioqalingajalersimanera pisimasoq piliarineqarmat.
Sakkortusaatitut pingaartumik pingaartinneqarpoq unnerluutigineqartoq siusinnerusukkut eqqartuunneqarsimammat meeqqamut kinguaassiutitigut atoqatiginninnermut, aammalu niviarsiararlu ukiui annertuumik nikingassuteqarneri.
Mitagaanermut ajunngitsorsiaassat niviarsiaqqamut eqqartuussisoqarfiup aalajangersagai atuuttussanngortinneqarput, suliami assingusini nalinginnaasumik tamanna periusiummat.
Taamaalilluni eqqartuussisoqarfiup eqqartuussutaa ataani aalajangerneqartutut atuuttussanngortinneqarpoq.
Eqqartuussisoqarfiup eqqartuussutaa atuuttussanngortinneqarpoq imatut allannguuserlugu, eqqartuussutigineqartoq pineqaatissinneqarsimasunut inissiisarfimmiinnissaq aalajangersarneqarpoq ukiumik ataatsimik qaammatinillu qulingiluanik.
Suliap normua: K 167/20
Eqqartuussissutit nassuiaatillu