Gå til sidens indhold

Nunatta Eqqartuussisuuneqarfia

29 apr 2021

Nunatta Eqqartuussisuuneqarfia

Nakuusernermi kiinnakkut ajoqusernermik kingunilimmi - K186/19

Angut 32-inik ukiulik Eqqartuussisoqarfik Sermersuumit pisuutinneqarpoq arnaq pingasoriarlugu niaquatigut tiitorfimmik anaasimaneranut passuttarialimmik ajoqusernermik kinguneqartumik. Eqqartuussisoqarfimmi atuuttussanngortitsivoq pisarialimmik imminut illersortariaqarsimalluni, tassami arnap kiinnamigut puujaasamik anaasimammani

Nunatta eqqartuussisuuneqarfiata inerniliinera

Unnerluutigineqartup piumasaqaatigisani nunatta eqqartuussisuuneqarfiani uteqqippaa, tassa saassussinermut pisarilimmik imminut illersorniarsimalluni, taamaattumillu pinngitsuutinneqartariaqarluni.

Nunatta eqqartuussisuuneqarfiata tunngavigivaa, arnaq siulliulluni unnerluutigineqartumut saassussisimasoq, tamatumalu kingornatigut tiitorfimmik anaasimagaa. Eqqartuussisoqarfittuulli nunatta eqqartuussisuuneqarfia isumaqanngilaq pisarialimmik imminut illersorniarnerusoq, tassami unnerluutigineqartup arnaq anaammagu taanna nalasoq, aammalu saassunneqarluinnalerneq pinngitsoortinniarlugu anaaserinerit pisariaqarsimanngimmata. Taamaalilluni unnerluutigineqartoq aamma nunatta eqqartuussisuuneqarfianit pisuutinneqarpoq nakuusernermut. Nunatta eqqartuussisuuneqarfiatali sakkukillisaatitut isigivaa, arnap siulliulluni unnerluutigineqartoq annerseqqaarsimammagu aammalu tassannga kamassaarneqarsimalluni. Taamatullu aamma eqqartuussisuuneqarfiup pingaartippaa piffissaq suliap suliarineqarneranut atorneqartoq sivisusimammat, tassami pinerliinermiit ukiut pingasut qaangiussimammata suliap eqqartuussisoqarfimmi suliarineqarnissaata tungaanut.

Taamaalilluni pineqaatissiissut aalajangersarneqarpoq utaqqisitamik ulluni 30-ni pineqaatissinneqarsimasunut inissiisarfimmiittussanngortitsinermik.

Ulloq aalajangiiffik

Nunatta eqqartuussisuuneqarfianit eqqartuussut nalunaarutigineqartoq ulloq 24. januar 2020-imi.

Suliap normua K186/19

Nunatta Eqqartuussisuuneqarfiata eqqartuussutaa

Sermersuup eqqartuussiviata eqqartuussutaa

Nassuiaatit