21 dec 2020
Nunatta Eqqartuussisuuneqarfia
Qaammatini sisamani inissiisarfimmiittussanngortitsisoqartoq - K 070/18
Angut 61-inik ukiulik Eqqartuussisoqarfimmit Sermersuumit ataasiarluni nakuusernermut pisuutinneqarpoq, taamanikkut inooqatigisimasaminut annersaasimalluni. Angut inooqatiminut tassunga marloriarluni nakuusersimanermut eqqartuussaasareersimavoq.
Unnerluutigineqartoq eqqartuussisoqarfimmi eqqartuunneqarpoq qaammatini sisamani inissiisarfimmiittussanngortinneqarluni.
Eqqartuussisoqarfiup eqqartuussutaa unnerluutigineqartumit suliareqqitassanngortinneqarpoq piumasaqaatigineqarluni inissiisarfimmiittussanngortitsineq utaqqisitanngortinneqassasoq.
Nunatta Eqqartuussisuuneqarfiata inerniliinera
Nunatta Eqqartuussisuuneqarfiata eqqartuussuteqarnerani eqqartuussisuusut assigiinngitsumik isummerput. Eqqartuussisuusut marluk taasipput eqqartuussisoqarfiup eqqartuussutaa qaqutigoortumik allanngortinneqassasoq qaammatini sisamani inissiisarfimmiittussanngortitsinermut utaqqisitamut. Tamanna pivoq unnerluutigineqartup inuttut atugai tunngavigalugit, ilanngullugu eqqarsaatigineqarluni taanna pukusummigut suliaritinnermi kingunerisaanik aalassarluttunngorsimasoq.
Eqqartuussisuusup ataatsip eqqartuussisoqarfiup eqqartuussutaata atuuttussanngortitsinneqarnissaa taasissutigaa, eqqarsaatigalugu nakuusernerup qanoq ittuunera kiisalu inummut tassungarpiaq nakuusernermut inissiisarfimmiittussanngortinneqarluni eqqartuussaanerminiit qaammatit sisamaanngitsulluunnii qaangiuttut nakuuseqqissimanera eqqarsaatigalugu.
Amerlanerussuteqarneq naapertorlugu eqqartuussuteqartoqarpoq, unnerluutigineqartorlu eqqartuunneqarpoq qaammatini sisamani utaqqisitamik inissiisarfimmiittussanngortinneqarluni ukiuni marlunni misiligaaffiliinertalimmik.
Ulloq aalajangiiffiusoq
Eqqartuussut Nunatta Eqqartuussisuuneqarfianit nalunaarutigineqarpoq ulloq 17. juli 2018.
Suliap normua: K 070/18
Nunatta Eqqartuussisuuneqarfiata eqqartuussissutaa
Sermersuup eqqartuussiviata eqqartuussissutaa